جب سے نکلا ہو اس گلی سے میں

جب سے نکلا ہو اس گلی سے میں

راستہ بھولنے کی عادت ہے

دل ناداں کے شوق اپنی جگہ

حسن کی اپنی اک روایت ہے

مسکراہٹ

مسکراہٹ سے دیکھ لیتے ہو

مسکراہٹ میں بات کرتے ہو

مسکراتے ہی دھیرے دھیرے سے

ہم کو یوں لاجواب کرتے ہو

نرم پلکوں سے بند ہونٹوں تک

ایک رشتہ ہے مسکراہٹ کا

ان کہی ان سنی سی آہٹ کا

بس ایک رشتہ ہے مسکراہٹ کا

ایک لمحا جو قضا ہو گیا

ایک لمحے کو سوچتا رہتا ہوں

ایک لمحے کو کوستا رہتا ہوں

ایک لمحہ جو خطا ہو گیا

ایک لمحا جو قضا ہو گیا

انجینیر خرم

ہم تو وہ سیارے ہیں

ہم تو وہ سیارے ہیں

جو رہ سکیں مدار میں

نہ چل سکیں قظار میں

یہ لا ابالی عادتیں

یہ جذب ِ دل کی حالتیں

ڈگر ڈگر گھمائیں گی

نگر نگر رلائیں گی

کہ کوئی بھی کشش ہمیں

نہ رکھ سکے گی دیر تک

کہ کوئی بھی نظر ہمیں

نہ چکھ سکے گی دیر تک

فطرت مزاج کا

کوئی کیا بگاڑ لے

دل کے اضطراب کی

کوئی کیا دوا کرے

کیا کہیں کہ کس لیے

اس قدر اداس ہیں

بے وجہ ہی خوش ہوئے

بے وجہ اداس ہیں

نہ چل سکیں خلاف ہی

نہ جی لگے ہے پیار میں

ہم تو وہ سیارے ہیں

جو رہ سکیں مدار میں

نہ چل سکیں قظار میں

خواب ہی خواب بھرے ہیں مرے خالی تن میں

ساحلی ریت پہ تصویر بناتا کیوں ہے

کارِ بے کار میں یہ عمر گنواتا کیوں ہے

خواب ہی خواب بھرے ہیں مرے خالی تن میں

اس قدر شوق سے آنکھوں کو ملاتا کیوں ہے

ہم لوگ کدھر جائیں

اس عقل کی دنیا میں

سب لوگ سیانے ہیں

سب دیکھ کے چلتے ہیں

سب سوچ کے کہتے ہیں

لیکن اسی دنیا میں

کچھ ہم سے جنوں پیشہ

جو پیار کے شیدائی، جو عشق میں سودائی

یہ لوگ کدھر جائیں

اس ظاہری دنیا میں

سب روگ ہیں جسموں کے

جو دل نے سنبھالے ہیں

وہ روگ کدھر جائیں

ہم لوگ کدھر جائیں

زندگی کے سودوں میں

زندگی کے سودوں میں

احتیاط لازم ہے

زندگی کو عادت ہے

دوہری چال چلنے کی

ہم سے سادہ لوحوں سے

ہیر پھیر کرنے کی

ایک بار میں نے بھی

بہت مہنگے نرخوں میں

روشنی کے رنگوں سا مال کچھ خریدا تھا

گھر میں جا کے دیکھا جب

زیوروں کے ڈبوں میں

روڑیاں تھیں مٹی کی

زندگی کے سودوں میں

احتیاط لازم ہے!

عشق تو ایسے جان میں اترے

عشق تو ایسے جان میں اترے

موتیا جیسے آنکھ میں اترے

عشق اترے تو پھر ٹھہر جائے

عشق تھا تو کہا ں گیا ہے اب

برف جیسا تو عشق ہوتا نہیں

دھوپ پڑنے سے جو پگھل جائے

عمر جیسا بھی عشق ہوتا نہیں

لمحہ لمحہ سا جو گزر جائے

عشق اترے تو پھر ٹھہر جائے

آنکھ میں جیسے کوئی مر جائے

سب کاغذی طوطے ہیں

کیوں مغز کھپاتے ہو
کیوں وقت گنواتے ہو
یہ دنیا نہ سمجھے گی
یہ لوگ نہ مانیں گے
انسان کی شکلوں میں
پتلی کے تماشے ہیں
یہ ٹین کے بندر ہیں
یہ کاٹھ کے گھوڑے ہیں
اور شور جو کرتے ہیں
سب کاغذی طوطے ہیں
اقدا ر و روایت پر
لڑتے ہیں جھگڑتے ہیں
پڑھ پڑھ کے کتابوں سے
یہ فیصلے کرتے ہیں
جو دل پہ لکھی رب نے
اس بات کو کیا جانیں
یہ جسموں کے قیدی ہیں
جذبات کو کیا جانیں
الفاظ کے کوزہ گر
احساس کو کیا جانیں
آنکھوں کی چمک دیکھیں
لہجے کی کھنک دیکھیں
جو سینے کے اندر ہیں
اس آگ کو کیا جانیں

ہنستے ہوئے چہروں کے
دن رات کو کیا جانیں
کیوں مغز کھپاتے ہو
کیوں وقت گنواتے ہو

یہ محبت ہے نام کی بس

یہ محبت نہ ہو گی ہم سے
یہ محبت ہے نام کی بس
اصول پہلے سے طے ہیں جس کے
عمر کی بھی حد ہے اس میں
مذہب جس میں دیوارکی صورت
لاج اس میں ہے غیرت اس میں
طریقے سارے ہی فلمی جس میں
دل بیچارے کے ساتھ دیکھو
کیسے کیسے مذاق یہاں پر
دل کے نام پہ میر ے یارا
یہ خیانت نہ ہو گی ہم سے
یہ محبت نہ ہو گی ہم سے
یہ محبت ہے نام کی بس

خواہشوں کی سننے سے

ساحلِ سمندر پر نقش سے بناتے ہو

اور پھر مقدر سے ضد بھی تم لگاتے ہو

زندگی کے سب رستے

طے ہوئے ہیں پہلے سے

جس طرف بھی لے جائیں

تم نے چلتے جانا ہے

خوابوں اور خیالوں کو نیند میں ہی رہنے دو

کیوں انہیں جگاتے ہو

اور جی جلاتے ہو

خواہشوں کی سننے سے 

تلخیاں حوادث کی

 اور بڑھ تو سکتی ہیں

کبھی کم نہیں ہوتیں

دل نے کیسی یہ جسارت کی ہے

دل نے کیسی یہ جسارت کی ہے

آپ جیسوں سے محبت کی ہے

ہم تو بس خواب سمجھ بیٹھے تھے

تیری آنکھوں نے شرارت کی ہے

برف پگھلی ہے کئی صدیوں کی

چاند نے ایسی تمازت کی ہے

دفن کر ڈالے تھے قصے دل کے

تو نے پھر آ کے قیامت کی ہے

کاٹ کھایا غمِ دنیا ہم کو
جب کبھی عشق سے غفلت کی

زندگی ایک نشہ ہے لوگو

آج تو ہم بھی شرابی ہوگئے

سوکھتا پیڑ تھے آبی ہو گئے

زندگی ایک نشہ ہے لوگو

منہ لگی جب سے گلابی ہو گئے

گیت

گیت:-

تیرے جیسا حسیں

کوئی ہوگا کہیں

سوچ سکتا نہیں

سوچ سکتا نہیں

--

تیرے ہونٹوں سے ہے

رس رہی زندگی

تیری آنکھوں میں ہے

بس رہی زندگی

تیرے قدموں تلے

بچھ رہی ہے زمیں

--

تیرے جیسا حسیں

کوئی ہوگا کہیں

سوچ سکتا نہیں

سوچ سکتا نہیں

--

میرے پیروں میں ڈالے بھنور لے چلا

اپنے بالوں سے تو ، باندھ کر لے چلا

ایسے جادو چلے

آفریں آفریں

گل پیا ڈھول بجونا پیندا

گل پیا ڈھول بجونا پیندا

عشق دا قول نبھونا پیندا

ماڑے دلبر دے جے آکھے لگیے

ماپیاں سولی چڑھونا پیندا

عشق نہ ذات پچھانے لوکو

عشق وچ آپ گوونا پیندا

یار وے----- مار دے

منظر: گھر سے بھاگی ہوئی لڑکی کے احسات جس کو شادی کہ بعد پتہ چلتا ہے کہ اس کا شوہر یا محبوب تو عادی مجرم اور نفسیاتی مریض ہے- اس کے پاس واپسی کے سارے راستے بند ہیں اور آگے بھی مایوسی کی اندھی غار ہے

گیت

پس منظر کی آواز—

یار وے----- مار دے

پہلا انترا

کِکراں نال میں لایاں یاریاں ، پپلاں دے دل توڑے

لوں لوں وچ ہن چبدیاں سولاں – سِر تے وجدے روڑے

بے فیضاں توں فیض نئیں لبھدا، لکھ ریاضتاں کر لے

پٹھے پینڈے پے گئے جیہڑے ، دن اناں دے تھوڑے

پس منظر کی آواز—

یار وے----- مار دے

لیر و لیر ہویا تن میرا ، درداں لائے ڈیرے

ادھی راتی ڈر ڈر اٹھدی ہنجو سکھ گئے میرے

جنگاں جت لیندے نے لوکی، لیکھ جتن گے کیہڑے

پریت ماہی دی راس نہ آوے چاری پاسے نیرے

پس منظر کی آواز—

یار وے----- مار دے

کی کراں میں کیس نو دساں کیڑے پاسے جاواں

ڈبدا جاوے دل سینے وچ، اوکھیاں ہویاں ساواں

سپھنے دیکھنے والی اکھ نو، کی میں ہن سمجھاواں

جیدے پچھے عمر گوائی او تے سی پر چھاواں



پس منظر کی آواز—

یار وے----- مار دے

مجھے محبت نے مار ڈالا

تجھے تو نفرت سے ہے شکایت، مجھے محبت نے مار ڈالا

جدائی ہوتی تو سہہ بھی لیتے ہمیں تو قربت نے مارڈالا

تھا زعم مجھ کو کہ میرا تیشہ تو کاٹ ڈالے گا پتھروں کو

تو ڈر گیا ہے تو بچ گیا ہے مجھے مہارت نے مارڈالا

اصلاں نال جے کریے نیکی

اصلاں نال جے کریے نیکی

نسلاں تکڑ نبھودیں نے

ماڑیاں نال جے چنگا کریے

پرت کے گل نو اوندے نے

عشق دے پینڈے پے کے عاشق

جندڑی روگ لگوندے نے

دل کنجر دے آکھے لگ کے

لوکی جان گووندے نے

آگ کا بھی پیٹ ہے نا

اپنی ننگی آنکھوں سے

دیکھ رہا ہوں موت کسی کی

سامنے اپنے

آگ کے اندر جھونک رہا ہوں

صندل کی اک شاخ کنواری

سوچ رہا ہوں بول پڑوں تو

رو پڑے کی آگ بےچاری

بھوک کی ماری

جانے کتنے سالوں سے

اس نے منت مانی ہو گی

آگ کا بھی پیٹ ہے نا!

میں نکل گیا ہوں مدار سے

میں نکل گیا ہوں مدار سے، مرے راستوں پہ غبار ہے

اسی کشمکش میں پڑا ہے دل کہ یہ بھول ہے یا فرار ہے؟

جسے راستوں نے جکڑ لیا ، اسے منزلوں کا شعور کیا

جو سلگ سلگ کے ہی بجھ گیا وہ چرا غ ہے نہ شرار ہے

بڑی کم نظر ہے وہ عاشقی جو خیال و خواب کی حد میں ہو

کہ حقیقتوں کے دیار میں کہاں وہمِ دل کا شمار ہے

جو چلا تھا درد سمیٹنے، وہی آج درد سے چور ہے

جسے فکر سارے جہاں کی تھی وہی آج خود پہ ہی بار ہے

یہ فلک کسی سے وفا کرے نہ زمیں کسی کی سدا رہے

بڑا مختصر سا قیام ہے بڑی بے مزہ سی بہار ہے

کبھی جو بیٹھ کے سوچوں تو سب خسارا ہے

بہت دیا ہے نصیبوں نے پھر بھی تیری کمی

کبھی جو بیٹھ کے سوچوں تو سب خسارا ہے

یہاں تیمارداری کو بھی لکھ لیتے ہیں کاغذ پر

یہاں تیمارداری کو بھی لکھ لیتے ہیں کاغذ پر

کہ کل بیمار جب میں ہوں ترا آنا بھی لازم ہے

تم نہیں ہو مگر پھر بھی

تم نہیں ہو مگر پھر بھی

ایسا لگتا ہے کہ تم ہو

ایک احساس ہے جو مجھے

کبھی تنہا ہونے نہیں دیتا

درد میں غم میں تیرا خیال

تھام لیتا ہے مجھے

اور رونے نہیں دیتا

مری بے کار سی باتیں تری پر مغز خاموشی

مری بے کار سی باتیں تری پر مغز خاموشی

تری قربت کا سوچوں تو یہی کچھ یاد آتا ہے

محبت

بکھرتی ہے تو خوشبوئوں پہ کچھ قابو نہیں رہتا
محبت پھول جیسی ہے
بھٹکتی ہے تو کانوں  میں دبا کر انگلی چلتی ہے
بہت گھمسان رستوں سے بنا دیکھے گزرتی ہے
محبت بھول جیسی ہے
کسی کم سن جوانی سے جو انجانے میں ہو جائے
گلی کوچوں میں اڑتی ہے
 یہ پیروں سے لپٹتی ہے
ہوا کا رخ بدلنے پر، یہ اپنا در بدلتی ہے
 محبت دھول جیسی ہے

انتہا ملن کی تو ، ٹوٹنے کے اندر ہے

زندگی سفر میں ہے ، آدمی مسافر ہے
جس طرح بھی ممکن ہو
اس نے چلتے جانا ہے
وقت کے بہائو میں
ہم نے بہتے جانا ہے
رزق ہو تعلق ہو
یہ تو بس بہانے ہیں
آدمی کی قسمت میں
کو بکو بھٹکنا ہے
دردبدر بہکنا ہے
دو قدم مسافت پر
راستہ بدلنا ہے
راستہ نہ بدلے بھی
تو بھی اس کو جانا ہے
عمر بھر کی سنگت کو
ایک پل نہیں لگتا
سامنے نگاہوں کے
سانسیں ٹوٹ جاتی ہیں
گرہیں چھوٹ جاتی ہیں
ہم بھی کتنے پاگل ہیں
رزق کو ، تعلق کو
جوڑ جوڑ رکھتے ہیں
اور بھول جاتے ہیں
انتہا ملن کی تو ، ٹوٹنے کے اندر ہے
 زندگی سفر میں ہے ، آدمی مسافر ہے

پیار محبت عشق کے وعدے

بیج وہی، زمین وہی

لیکن مرضی موسم کی

موسم فیصلے کرتا ہے

کب پھولوں کو کھلنا ہے

کب پتوں کو جھڑنا ہے

پیار محبت عشق کے وعدے

کس کے بس کی باتیں ہیں؟

درد کی رت میں وہ آیا تھا گلابی ہو کر

درد کی رت میں وہ آیا تھا گلابی ہو کر

میں اسے دیکھتا جاتا تھا شرابی ہو کر

اس کی چپ چاپ نگاہیں تھیں سوالی جیسی

اور میں ضبط گنوا بیٹھا جوابی ہو کر

پھر اسے اور مجھے اور کہیں جانا تھا

ایک لمحے کو وہ ٹھہرا تھا حبابی ہو کر

وہ دل و جان سے میرا ہے مگر اس کا وجود

چھین لے گا یہ زمانہ ہی عقابی ہو کر

عشق میں سود و زیاں کارِ جہالت تھا ریحان
راکھ ہی راکھ سمیٹی ہے حسابی ہو کر

اس حسین موسم میں

اس حسین موسم میں

تیرتی ہوائوں میں

پیار کی مہک سی ہے

اور اس کی آنکھوں کی

نرم سی جھلک بھی ہے

چاند کی طرف دیکھو

کیسے چاند لیٹا ہے

چاند کے بچھونے پر

اور اس کی آنکھیں بھی

ڈبکیاں لگاتی ہیں

اور ڈوب جاتی ہیں

دور افق پر اے دوست

دور افق پر اے دوست

اس حسین موسم میں

اجنبی کہوں کیوں کر

اجنبی تو ہو لیکن
اجنبی کہوں کیوں کر
چاہ کےمحبت کے
سارے خواب ہم سے ہیں
رسم ہے زمانے کی
عشق کو دبا رکھنا
بارشوں کے موسم میں
حبس سا بنا رکھنا
قید کے اذیت کے
سب حساب ہم سے ہیں
سادگی بھی ہم سی ہے
عاجزی بھی ہم سی ہے
اور خوشی کے موسم میں

یہ ہنسی بھی ہم سی ہے
پھول مسکراہٹ کے
جب کبھی بھی کھلتے ہیں
ہونٹ کھینچ دیتے ہیں
آنکھ میچ دیتے ہیں
دانت جھانک لیتے ہیں
سانس سانس جینے کے
سارے باب ہم سے ہیں
ہر برس جنم دن پر
ہم بھی سوچتے ہیں اور
تم بھی سوچتے ہو گے
اس خدائے برتر نے
ہم کو آسمانوں سے
کس لیے اتارا ہے
کس لیے بنا یا ہے
زیست کے تعلق کے
سب سوال ہم سے ہیں
سب جواب ہم سے ہیں
اجنبی تو ہو لیکن
اجنبی کہوں کیوں کر

بسترِ مرگ اب خالی ہے

لو ہم یہ جگہ چھوڑ چلے

 لوبسترِ مرگ اب خالی ہے - کسی اور کی جاں لینے کو

جس میں دم ہو چلا آئے

ٹوٹ کر چاہنے والے اکثر

ٹوٹ کر چاہنے والے اکثر

توڑ کر چھوڑ بھی تو جا تے ہیں

اتنا بڑا گھائو ہے سینے میں

اتنا بڑا گھائو ہے سینے میں

تم جو لگو سینے سے

  سما سکتے ہو سینے میں

اس کی وہ نرم گلابی سی ہنسی

چاندنی پھول کھلانے آئی

رات کو دھوپ بنانے آئی

گھپ اندھیرا تھا مرے رستوں میں

اک کرن دل کو جلانے آئی

اس کی وہ نرم گلابی سی ہنسی

گدگدی دل میں جگانے آئی

زندگی سست جمائی جیسی

تیری آنکھوں میں نہانے آئی

پھر محبت نے پکارا ہم کو

پھر سے دنیا ہی ستانے آئی

پھر سے چپ چاپ چلے آئے ہیں

پھر کوئی یاد سلانے آئی

وہ دعائوں میں مجھے مانگے ریحان

کہکشاں خاک کمانے آئی

مجھے سکون نہیں ہے، مجھے سکون نہیں

مجھے سکون نہیں ہے، مجھے سکون نہیں
وہ شخص جب سے حسیں ہے، مجھے سکون نہیں

کوئی نگر تو ہو ایسا جہاں سلوک ملے
یہ خود غرض سی زمیں ہے ، مجھے سکون نہیں

وہ روپ چاند کا لے کر لگانے آگ ہی آئے
گلاب خار نشیں ہے ، مجھے سکون نہیں

کوئی تو زلف کا بادل کبھی امید بنے
یہ دشت جسم حزیں ہے ، مجھے سکون نہیں

کوئی تو پھول لگے دل کے نخلِ حرماں پر
خزاں رسیدہ زمیں ہے ، مجھے سکون نہیں

میں بندگی میں بھلا تھا ، مجھے خدا کیوں کیا

میں بندگی میں بھلا تھا ، مجھے خدا کیوں کیا
خدا بنا ہوں میں جب سے مجھے سکون نہیں

مجھے خدا نہ کرو تم، مجھے خدا نہ کرو

مجھے خدا نہ کرو تم، مجھے خدا نہ کرو
تمہاری بندگی مجھ کو تو مار ڈالے گی
کہاں یہ ظرف کہ اتنے گناہ معاف کروں
کہ مجھ میں بوجھ اٹھانے کا حوصلہ کب ہے
کہ میں تو خود ہی کسی گود کی تلاش میں ہوں
تمہارے سجدے مرے پائوں باندھ دیتے ہیں
مجھے بتوں کی طرح قیدِ بے بسی نہ کرو
کہ میں تو خود ہی گرفتارِ جالِ قسمت ہوں
مجھے سزا نہ کرو تم مجھے سزا نہ کرو
مجھے خدا نہ کرو تم، مجھے خدا نہ کرو

انہی چند لمحوں سے

اپنے حصے آئے ہیں

چند لمحے چاہت کے

انہی چند لمحوں سے

عمر کشید کرنی ہے

یہ محبت ہی تو ہے

یہ محبت ہی تو ہے

جو ہم کو اچھا کہتی ہے

وگرنہ ہم سے لوگوں کو

دھن دولت کی دنیا میں

کون بھلا خریدے گا

تم بھی کوئی موسم ہو

ہر برس دسمبر میں

دل کے سرد خانوں میں

شور ہونے لگتا ہے

تم بھی کوئی موسم ہو

پھر سے لوٹ آتے ہو!

پیار کرنے والے بھی

پیار کرنے والے بھی

ٹوٹتے ستاروں سے

کتنے ملتے جلتے ہیں

ٹوٹتے ستارے بھی

پیار کرنے والوں سے

سرپھرے سے ہوتے ہیں

وصل کی تمنا میں

کہکشاں روایت کی

توڑ کر نکلتے ہیں

خواب کے دلاسوں پر

آسماں سے گرتے ہیں

اور بھول جاتے ہیں

واپسی کے رستوں کو

اور ٹوٹ جاتے ہیں

خواہشوں کے اندر ہی

منزلوں سے پہلے ہی

کیا دیا محبت نے

کیا دیا محبت نے
چاہنے کی عادت نے
درد ہے اذیت ہے
منہ چھپاتے پھرتے ہیں
عمر بھر ندامت ہے
تم بھی کتنے پاگل ہو
وصل وصل کرتے ہو
اس جہانِ کم تر میں
وصل ہجر ہی تو ہے
ایک جبر ہی تو ہے
ہم نے ساتھ دینا ہے
عمر بھر زمانے کا
اِس طرح بھی قیدی ہیں
اُس طرح بھی قیدی ہیں

مجھے سمیٹو کسی روز پیار میں ایسے

زمیں پہ بیٹھ کے اپنی قمیص کا پلو 

اٹھا کے خاک سے رکھتے ہو گود میں جیسے

مجھے سمیٹو کسی روز پیار میں ایسے

لیکن اس زمانے نے

روشنی محبت کی

آنکھ کے دریچوں میں
آفتاب جیسی ہے

جس طرف بھی کھلتے ہیں

صبح ہونے لگتی ہے

قد کا بانکپن دیکھو

جب بھی اٹھنے لگتا ہوں

آسماں کو چھوتا ہوں

بازووں کے حلقوں میں

کہکشائیں چھپتی ہیں

سوچنے کی عادت ہے

سوچتے ہی گزری ہے

بادلوں کے ٹکڑوں پر

تیرے خواب لکھتا ہوں

بے حساب لکھتا ہوں

لوٹ کو ستاروں کو

شب کی کالی چادر پر

روشنی کے دھاگوں سا

تیرا نام لکھتا ہوں

صبح شام لکھتا ہوں

لیکن اس زمانے نے

پائٔوں میرے جکڑے ہیں

ضبط کی زمینوں میں

تم نے کیسا دیکھا ہے، زاویے کے اوپر ہے

زندگی کے ہیرے کی ، سو ہزار کنیاں ہیں

تم نے کیسا دیکھا ہے، زاویے کے اوپر ہے

کیا کریں سرابوں کا

میری تیری قسمت میں
لفظ ہی محبت تھے
لفظ ہی محبت ہیں
میری تیری چاہت میں
خواب ہی حقیقت تھے
خواب ہی حقیقت ہیں
کیا کریں سرابوں کا
کیا کہیں فسانے ہیں
کیوں مجھے سمجھتے ہو
چاند اپنے آنگن کا
ہم خلا نوردوں کا
گھومنا مقدر تھا
گھومنا مقدر ہے
ہم نے چلتے جانا ہے
اپنےاپنے رستوں پر
کوئی میرا محور ہے
کوئی تیرا محور ہے

اس وحشی کو زنجیر ڈلے

ماتھے پر جسم کے دام لکھے
کیوں قریہ قریہ پھرتے ہو
ہاتھوں میں فن کی کتاب لیے
تم کس کو  ڈھونڈتے رہتے ہو
یہ دنیا چور بازاروں کی
 یہ دنیا حرص کےماروں کی
یاں ذرا ذرا سی باتوں پر
 سرتن سے جدا ہو جاتے ہیں
یاں کھود کے پچھلی قبروں کو
لاشوں کو پیٹا کرتے ہیں
تم پاگل ہو دیوانے ہو
کیا باتیں بکتے پھرتے ہو
انسان جسے تم کہتے ہو
جنگل سے بھاگ کے آیا ہے
اور شہر شہر دندناتا ہے
یہ خونی ہے ، یہ وحشی ہے
اس وحشی کو زنجیر ڈلے
اس وحشی کو زنجیر ڈلے

Written on Sialkot Incident........................

گزرے سالوں کو تو آواز لگاتا کیوں ہے

لوٹ کر کیسے بھلا آئے گا جانے والا
یاد بن بن کے ہی رہ جائے گا جانے والا
گزرے سالوں کو تو آواز لگاتا کیوں ہے
اب وہ انداز نہ دوہرائے گا جانے والا

جنہیں زندگی نے اماں نہ دی وہ ترے نشے میں بہک گئے

میرے ساقیا تو گماں نہ کر کہ تری نظر سے بھٹک گئے
جنہیں زندگی نے اماں نہ دی وہ ترے نشے میں بہک گئے

جنہیں قربتوں کا جنون تھا، انہیں ان کی طلب نے ڈبو دیا
جو ریاضتوں میں لگے رہے وہ بنا پیے ہی مہک گئے

یہ جو خواہشوں کی چمک دمک ترے خال و خد پہ سجی ہوئی
یہ تو رسیاں ہیں صلیب کی جنہیں ہم پہن کے لٹک گئے

ہمیں زندگی تو ملی مگر ہمیں زندگی کی سمجھ نہ تھی
کوئی چاند بن کے گہن گیا کئی راکھ رہ کے چمک گئے

وہی بے خبر وہی با خبر ، بھلا خاکیوں کی بساط کیا
انہیں جس طرف سے صدا ملی یہ اسی طرف کو لپک گئے

یہ جو اونچ نیچ کا کھیل ہےیہ تو بس نظر کا فریب ہے
کبھی کھلکھلا کے بکھر گئے، کبھی رو رلا کے چٹک گئے

کون کب کہاں ڈوبے

زندگی کے ساگر میں

لہریں ہیں مقدر کی

شور ہے ہوائوں کا

اور جوار بھاٹا ہے

چاند کی ادائوں کا

کون کب کہاں ڈوبے

کون جان سکتا ہے

کون جان پائے گا

ہر کسی سے طریقہ پوچھتا ہوں

کس طرح لوگ جیتے جا رہے ہیں
ہر کسی سے طریقہ پوچھتا ہوں

اپنے حق سے زیادہ مانگتا ہوں

اپنے حق سے زیادہ مانگتا ہوں
کہ میں تیرا سہارا مانگتا ہو ں

خرچ بیٹھا ہوں اپنا حصہ کب سے
اب پرایا اثاثہ مانگتا ہو ں

چاند بے نور ہوتا جا رہا ہے
چاندنی سے لبادہ مانگتا ہوں

تھا رواجوں کا بزدل سا میں باغی
ڈر گیا ہوں ازالہ مانگتا ہوں

پہلے تو قربتوں کی خواہشیں تھیں
اب فقط غائبانہ مانگتا ہو ں

آنکھ کو راز بتانے کی اجازت نہ ملی

آنکھ کو راز بتانے کی اجازت نہ ملی
راز کو بات میں آنے کی اجازت نہ ملی

دیکھتے دیکھتے بوڑھا ہو گیا ہے وہ شخص
حال دل اس کو سنانے کی اجازت نہ ملی

سامنے میرے وہ ہوتا رہا پتی پتی
راہ سے پھول اٹھانے کی اجازت نہ ملی

اب تو بس گزرے زمانوں کا خیال آتا ہے
جب ہمیں خواب سجانے کی اجازت نہ ملی

وہ تو جھکتا ہی گیا میری طلب میں ریحان
مجھ کو ہی ہوش میں آنے کی اجازت نہ ملی

کسی ٹوٹے شجر کی صورت تھی

کسی ٹوٹے شجر کی صورت تھی
اس کی الفت فقط ضرورت تھی
ہم جسے چاہ سمجھا کرتے تھے
جسم کی ہوس تھی کدورت تھی
جیت کر ہم نے راز پایا ہے
ہار اس سے بھی خوبصورت تھی
دیکھنے میں چٹان  جیسی تھی
بھربھری ریت کی جو مورت تھی
ساری دنیا کا کیا قصور اس میں
ایک سادہ، بھلی سی صورت تھی

سفید پوش محبتیں

ہم سفید پوشوں کی
چاہتیں بھی ہم سی ہیں
نام لحاظ کے رشتوں میں
عمر گزاردیتے ہیں
دو وقت کی روٹی میں
محبوب پال لیتے ہیں
کس کے پاس جانا ہے
کس سے دور رہنا ہے
بچپن سے طے ہو جاتا ہے
پھر بھی خود فریبی کو
اور جگ فریبی کو
ڈھونگ رچاتے پھرتے ہیں
ہم پیار جتاتے پھرتے ہیں

وقت کیا ہے؟

وقت ایک بہائو ہے جو ہر پل حقیقت کو عدم میں دھکیلتا جاتا ہے- ہر آنے والا کل ایک غیر شفاف چادر کی طرح گزرے ہوئے کل کو ڈھانپ لیتا ہے- یوں دن مہینوں میں، مہینے سالوں میں اور سال صدیوں میں بدل جاتے ہیں۔ اور کس کی مجال ہے کہ اتنی انگنت چادروں کے نیچے دبے ہوئے موہوم ماضی کو دیکھ سکے۔وقت کی چرخی کو الٹا گھما سکے- ایسا صرف وہی ذات کر سکتی ہے جس نے وقت کو پیدا کیا – وقت کے اس بے کراں سمندر میں فانی انسان کی فانی شہرت اور بقا کے کیا معانی! -

لوگ کہتے ہیں کہ ۔۔۔۔

مر گیا آج جو کل تک مرے ہمراہ رہا
پھر بھی لگتا ہے کہ زند ہ ہے وہ ہم سب کی طرح
اس کے دروازے پہ دستک تو ذرا دینا تم
مسکراتا ہوا پردے کو ہٹا ئے گا وہ
پیٹھ پر ہاتھ رکھے قہقہ لگائے گا وہ
اب بھی لگتا ہے گھنے پیڑ کی چھائوں میں وہ
ہاتھ میں شاخ لیے پائوں پسارے ہو گا
بات پر بات بنانا تو ہے عادت اس کی
بات پر بات بناتا ہو گا ہنس ہنس کر وہ
لوگ کہتے ہیں کہ دفنا بھی چکے ہیں اس کو!!

ڈھونڈے بہت سہارے مگر بات نہ بنی

ڈھونڈے بہت سہارے مگر بات نہ بنی

تیرے بغیر پیارے مگر بات نہ بنی

پوچھے کوئی تو کیا کہیں اک شخص کے لیے

دونوں جہان وارے مگر بات نہ بنی

کچھ وہ وفا شعار تھا کچھ کم نصیب تھا

ہم اپنی جاں بھی ہارے مگر بات نہ بنی

یوں تشنگی بڑھی کہ سمندر ہی پی گئے

پانی تھے وہ بھی کھارے مگر ، بات نہ بنی

اک شخص لکھ گیا ہے مقدر کچھ اس طرح

کر ڈالے جتن سارے مگر بات نہ بنی

بد گمانی

گلے کٹ جائیں رشتوں کے
محبت راکھ ہو جائے
ذرا سی بد گمانی سے
سبھی کچھ خاک ہو جائے
طبیعت کیا ، جبلت کیا
سبھی باتیں ارادوں کی
کدورت دل میں آجائے
تو صورت کا تعارف کیا
بغا وت پر اتر آئے
تو برف بھی آگ ہو جا ئے
ذرا سی بد گمانی سے
سبھی کچھ خاک ہو جائے

محبت پھول رکھتی ہے چھپا کر کیوں کتابوں میں

محبت پھول رکھتی ہے چھپا کر کیوں کتابوں میں
یہ دنیا دیکھ لیتی ہے نقابوں میں حجابوں میں
 

کبھی تتلی کے پر نوچیں ، کبھی جگنو کی دم کاٹیں
جہاں میں حسن والوں کی تو کٹتی ہے عذابوں میں
 

بہت ہی ریتلی سی ہے ہنسی اس کی ملائم سی
میں بہتا ہی چلا جائوں سوالوں میں جوابوں میں
 

طلوع ہوتا ہے وہ چہرہ مری راتوں کی خلوت میں
کہ جیسے نرم بارش ہو اجالوں کی گلابوں میں
 

ہمیں معلوم ہی کب تھا کہ دل تجھ کو بھی چاہے گا
تجھے تو ہم نے رکھا تھا خیالوں میں نہ خوابوں میں
 

محبت جسم جب ٹھہری توکیا دے گا دلیلیں پھر
یہ جذبہ آسمانی تھا کبھی تیرے نصابوں میں

اے گلابِ من

اے گلابِ جاں ، اے گلابِ من
مری بات سن، مری بات سن
تجھے توڑ لوں یہ کہا نہ کر
مرے ساتھ ساتھ رہا نہ کر
مرے ہاتھ چھلنی ہیں اس قدر
تجھے توڑنے کی سکت نہیں
یہ لہو لہو سا بدن مرا
کوئی زندگی کی رمق نہیں
مرے ہم نوا مرے دل جگر
بڑی دیر بعد ملا ہے تو
ترے آنے سے ذارا پیشتر
کوئی خار مجھ میں چبھو گیا
کوئی موت مجھ میں سمو گیا

ابھی یہ عشق کم سن ہے

ابھی یہ عشق کم سن ہے
ابھی اظہار مت کرنا
جنوں کی آگ بڑھنے دو
ابھی کچھ روز جلنے دو
اگر یہ راکھ کر ڈالے
سمجھ لینا کہ ناقص ہے
 سمندر میں بہا آنا
اگر کندن بنا ڈالے
سمجھ لینا کہ خالص ہے
بہت نایاب گوہر ہے
اسے بیکار مت کرنا
کسی کم ظرف کے آگے
کبھی اظہار مت کرنا

گھٹن

بھا گ کرآگئے
اپنا گھر چھوڑ کر
آشیاں ہی اگر
لگ رہا ہو قفس
آشیاں پھونک دو
بے اماں شہر کا
ہر مکاں پھونک دو

مرے یارا یہ عشق اپنا خدا سا تھا خدا سا ہے

سنا ہے اور نہ دیکھا ہے نہ سوچا اور نہ سمجھا ہے
مرے یارا  یہ عشق اپنا  خدا سا تھا خدا سا ہے

وفا مجبوری بن جائے تو رشتوں کا نبھانا کیا

وفا مجبوری بن جائے تو رشتوں کا نبھانا کیا
یہ دل ہی روٹھ جائے جب تو دلبر کا منانا کیا

تری دنیا کی شرطوں نے جوانی باندھ کے رکھ دی
پڑی ہو پائوں میں بیڑی تو منزل کا بلانا کیا

چمن میں ایک ہی گل تھا کہ میرے نام پر کھلتا
مگر یہ دھوپ  دنیا کی کہ کھلنا اور کھلانا کیا
 

یہ عادت ہے بری اپنی کبھی مایوس نہ ہونا
وگرنہ خشک پتھر پر گلابوں کو اگانا کیا
 

تمہیں معلوم ہی کیا ہے کہ تم کو کتنا چاہا ہے
یہ باتیں دل کی باتیں ہیں سنانا کیا جتانا کیا
 

ہمیں تسلیم ہے لوگو ، محبت جان لیوا ہے
مگر ہم بےٹھکانوں کا بغیر اس کےٹھکانہ کیا

جتنے مرضی پائوں پسارو

جتنے مرضی
پائوں پسارو
وقت رکا ہے
نہ ہی رکے گا
ریت کی مانند
عمر کا توشہ
ہاتھ سے اپنے
گرتا رہا ہے
گرتا رہے گا
آنکھ کا تارہ
جان سے پیارہ
یار ہمارا
لوٹ کے پھر سے
آ نہ سکے گا

وقت دریا کی طرح ہم کو بہاتا جائے

دکھ زمانے کا تری یاد مٹاتا جائے
وقت دریا کی طرح ہم کو بہاتا جائے

ذہن اور جسم تو دنیا سے بندھے ہیں یارا
ایک دل ہے جو ترا عشق نبھاتا جائے

تیری آنکھوں کے دیے خواب بنے ہیں جب سے
تیرا دیوانہ اندھیروں کو گراتا جائے

تیری آنکھوں  میں کوئی عذر حیا کا ہی سہی
سرد لہجہ تو تجسس کو بڑھاتا جائے

حال تیرا بھی مرے حال سے ملتا ہے اب
وقت تجھ کو بھی زمانے سا بناتا جائے

یہاں خوابوں پہ مت رہنا

یہاں جینے کے سب رستے
یونہی الجھے سے ملتے ہیں
جو ہمت ہو تو جی لینا
یہاں خوابوں پہ مت رہنا
کہ خوابوں کے سبھی منظر
فقط خوابوں میں ملتے ہیں

مجھے خوابوں میں رہنے دو

مجھے خوابوں میں رہنے دو
مجھے تعبیر مت دینا
کہ تعبیروں کے کاسے میں
ندامت کے سوا کیا ہے
مرے خوابوں کی دنیا میں
مری مرضی تو چلتی ہے
مجھے مرضی میں جینے دو
مجھے تقدیر مت دینا
مجھے تعبیر مت دینا

کہ گھٹن بڑھنے لگی تو گھر سے باہر آگئے

خاک کے کیڑے مکوڑے خاک اوپر آگئے

کہ گھٹن بڑھنے لگی تو گھر سے باہر آگئے

بے اماں سے لوگ تھے ہم، منزلوں کی بات کیا

گھر سے نکلے چلتے چلتے آپ کے گھر آگئے

کیا خبر تھی روشنی کا آگ سے رشتہ بھی ہے

سر پھرے سے کچھ پتنگے شمع اوپر آگئے

جب بھی ساقی نے پکارا عذرِ مجبوری رہا

آخرِ شب ٹوٹا پیالہ خالی لے کر آگئے

جس کی بنیادوں میں رکھے خواب ساری عمر کے

اس مکاں کے اینٹ پتھر میرے سر پر آگئے

ہم دوا کرتے گئے اور درد بڑھتا ہی گیا

جب نہ کچھ بھی ہو سکا تو جان دے کر آگئے

لوگ گرتے ہیں کیسے دولت پر

لوگ گرتے ہیں کیسے دولت پر

ایک سکہ اچھال کر دیکھو

درد کی باقیات کا نام

درد کی باقیات کا نام

لوگ تخلیق رکھ دیتے ہیں

جان سے جان ٹوٹتی تو ہم نے دیکھی ہے

محبت مرنے لگتی ہے

عاشقوں کی بستی میں

کچھ کم سخن بھی ہوتے ہیں

عمر بھر محبت کا سبق یاد کرتے
لیکن عین موقع پر

کچھ بھی کہ نہیں سکتے

سال گزرتے جاتے ہیں

رنگ اترتے جاتے ہیں

اور یہ لوگ گم صم سے

ان ڈور پلانٹس کی طرح

جب بھی سر اٹھاتے ہیں

کم ظرف سماج کی آری چلنے لگتی ہے

محبت مرنے لگتی ہے

تم نے بھی مر ا غور سے چہرہ نہیں دیکھا

تم نے بھی مر ا غور سے چہرہ نہیں دیکھا

باتیں تو سنی ہیں کبھی لہجہ نہیں دیکھا

اس دشتِ محبت میں سزا ہو کہ جزا ہو

اس دشت کا زائر کبھی ٹھہرا نہیں دیکھا

ایمان سمجھتے ہو محبت میں وفا کو

لگتا ہے ابھی تم نے زمانہ نہیں دیکھا

اک رات کوئی چاند مری آنکھ میں اترا

پھر عمر کٹی یوں کہ سویرا نہیں دیکھا

دامن میں بھری آگ تو دل کیوں نہ جلے گا

صدیوں سے کوئی معجزہ ہوتا نہیں دیکھا

اس محبت میں سبھی آبلہ پا دیکھے ہیں

کبھی قسمت سے کبھی خود سےخفا دیکھے ہیں

اس محبت میں سبھی آبلہ پا دیکھے ہیں

درد آیا ہے تو کچھ روز ٹھہر جانے دے

آنکھ نے پہلی دفعہ داغِ وفا دیکھے ہیں

یہ محبت تھی دوریوں کے سبب

سوچ تیری زباں مری ہو گی

اب محبت میں خود کشی ہو گی

یہ محبت تھی دوریوں کے سبب

پاس آئے تو بحث ہی ہو گی

خوش رہوں گا تو چپ رہوں گا میں

دل جلے گا تو شاعری ہو گی

روشنی کی لکیر دیکھی ہے

ہچکی شمع کی آخری ہو گی

درد کندن بنا گیا اب کے

اب تو قسمت بھی سوچتی ہو گی

کوئی آئے مجھے کتاب کرے

ذات میری کتاب تھی کوئی

رنگ برنگی کہانیوں والی

کچھ محبت کے خواب رکھے تھے

کچھ خیالوں کے چاند بستے تھے

بہت بکتی تھی بازاروں میں

میرا محبوب حسد کر بیٹھا

پرزہ پرزہ اڑا گیا مجھ کو

لفظ سارے ہی چھِل گئے تن سے

کورا کاغذ بنا گیا مجھ کو

میری آنکھوں میں پھر سے خواب بھرے

کوئی آئے مجھے کتاب کرے

جاتے جاتے دل بے کار کا سودا کر دوں

سوچتا ہو ں کہ اب اظہار تمنا کر دوں

جاتے جاتے دل بے کار کا سودا کر دوں

ہے محبت تو زمانے کی روایت کیسی

توڑ کر ساری حدیں راز کو افشا کر دوں

ضد یہ تیری کہ تجھے چاہوں فقط یادوں میں

شوق میرا کہ ترے نام کا چرچا کر دوں

ایک پل کے لیےتم نے جو مجھےچاہا تھا

عمر ساری اسی اک پل پہ ہی صدقہ کر دوں

حسن نکھرا کہ مری آنکھ جمالی ہوئی

دل یہ کہتا ہے کہ تصویر وہ چہرہ کر دوں

ملاتو ہے سوال اور کا تھا

بات تیری خیال اور کا تھا

ملاتو ہے سوال اور کا تھا

تجھے چاہا بہت مگر ایسے

شکل تیری جمال اور کا تھا

عمر ساری ترے ہی نام مگر

تو ملا جب وہ سال اور کا تھا

وصل کی شب یہ سانحہ تھاعجیب

جسم تیرا وصال اور کا تھا

تم تو رستے میں مل گئے یوں ہی

دل کی منزل جمال اور کا تھا

نکل کر تیرے کوچے سے کدھر کا رخ کریں بابا

نکل کر تیرے کوچے سے کدھر کا رخ کریں بابا

ترے طعنے ہی ملتے ہیں جدھر کا رخ کریں بابا

درد کے ساتھ دوا بھی دے گا

درد دے گا تو دوا بھی دے گا
زخم کے ساتھ ہوا بھی دے گا

ہجر میں درد سے ڈرتے کیوں ہے

رفتہ رفتہ یہ مزہ بھی دے گا

عشق میں وصل گناہوں جیسا

وصل دے گا تو سزا بھی دے گا

تیری آنکھوں میں ڈبونے والا

دل کے رستے کا پتہ بھی دے گا

مسکرا کر ترا ملنا مجھ سے

اچھا لگتا ہے دغا بھی دے گا

عشق اور وہ بھی بڑھاپے کا ریحاں

لطف دے گا تو جلا بھی دے گا

جانےکب تک ستائے گی دنیا

پھر محبت نے پکارا ہے مجھے

ایک دیوار کے پیچھے سے

ایک دیوار کہ جس کہ اندر

کوئی دروازہ ہے کھڑکی ہے نہ روشنداں

جانےکب تک ستائے گی دنیا

ہماری قسمتوں کےبننے میں بس ایک خامی ہے

ہماری قسمتوں کےبننے میں بس ایک خامی ہے

کبھی بھی یہ ہمارے دل کی مرضی سے نہیں بنتیں

خواب جینے کا سہارا تھے مگر تیرے بغیر

ایسا لگتا ہے مقدر نہیں ہرنے والا
مر بھی جائوں تو وہ میرا نہیں بننے والا

ایک بھی سانس گوارا نہ تھی جس کو تم بن
کیسے اجڑا ہے وہ دل پیار میں بسنے والا

خواب جینے کا سہارا تھے مگر تیرے بغیر
آنکھ کا نیند سے رشتہ نہیں جڑنے والا

بے دلی سے دم رخصت یوں ملائیں نظریں
جیسے سب چھوڑ گیا پاس سے اٹھنے والا

ہاں مگر سوچ ہماری پہ تو حق ہے اپنا

سوچ میں قید ہے اب چھوڑ کے جانے والا

اول اول تو وہ کرتا تھا شکایت میری

اول اول تو وہ کرتا تھا شکایت میری
اب مری بات پہ موضوع ہی بدل جاتا ہے

رتجگے بڑھتے چلے آتے ہیں قاتل کی طرح

رتجگے بڑھتے چلے آتے ہیں قاتل کی طرح
جسم کچھ روز میں ہو جائے گا مقتل کی طرح

عشق نے پھر سے دلِ زار پہ دستک دے دی
کھول کر بازو ملا دل بھی مقابل کی طرح

یہ پڑی جان یہ دل اور یہ دستار بھی ہے!
اور تو اب بھی مجھے دیکھے ہے سائل کی طرح

تپتا صحر ا ہوں میں اک بوند گراتے جائو
حسن چھلکائے ہوئے پھرتے ہو چھاگل کی طرح

باندھ لو سر پہ کفن آج تو طوفاں ہو گا
حسن پھر ہم پہ برسنے کو  ہےبادل کی طرح

عشق تیر ا ہے کہ جادو سا ہوا ہے مجھ پر
میں کہ کھنچتا ہی چلا جاتا ہو ں آنچل کی طرح

تیری باتوں سے بھی زیادہ تری چپ لے بیٹھی
میں اترتا ہی گیا آنکھوں میں دلدل کی طرح

اپنے پیروں میں جو  روندھا تھا حقارت سے کبھی
اب اسے ڈھونڈتا پھرتا ہوں میں پاگل کی طرح
 

جب اچھالیں لوگ پتھر پھول پھل بھی کیا کریں

ہم نے اپنی کھیتی سینچی ، وقت سے کچھ پہلے ہی
اس لیے تو، ٹوٹی  ٹہنی، وقت سے کچھ پہلے ہی

جب اچھالیں لوگ پتھر پھول پھل بھی کیا کریں
ہو گئی ہے شاخ خالی ، وقت سے کچھ پہلے ہی

عشق کی چاپ سنائی دی ہے

عشق کی چاپ سنائی دی ہے
آگ ہی آگ دکھائی دی ہے

جان سے جسم جدا ہو جیسے
آج یوں تجھ کو دہائی دی ہے

وقت نے زخم دیے ہیں ہم کو
اور قسمت نے جدائی دی ہے

اک جھلک تیری چرانے کے لیے
عمر کی ساری کمائی دی ہے

دلِ وحشی کا نہ پوچھے کوئی
جب سے وہ شکل دکھائی دی ہے

عشق ضدی نہیں مانا اک بھی
عقل نے لاکھ صفائی دی ہے

وہم میرا ہے کہ روتا ہے وہ؟
درد کی ہوک سنائی دی ہے

غم کا سیلاب امڈ آنے دو
ضبط نے آج رہائی دی ہے

میرا محبوب ہے مجھ سے بڑھ کر
ہاتھ مانگا تھا کلائی دی ہے

کیسے آنکھوں سے وہ چہرہ جائے

کیسے آنکھوں سے وہ چہرہ جائے
دیکھنا جس کا نہ دیکھا جائے

آنکھ ملتے ہی بکھر جاتا ہے
بات سے کیسے سمیٹا جائے

سب ستم بھول کے جو ملتا ہے
کیسے وہ شخص بھلایا جائے

ہم ہوئےغیر مگر اس کی تو
یہی ضد ہے اسے چاہا جائے

مسکرائے تو مری سانس رکے
حسن کیسے یہ سنبھالا جائے

تیری آنکھوں سے پیے جام بہکتا ہوں میں

تیری آنکھوں سے پیے جام بہکتا ہوں میں
تن بدن پھول کھلے آج مہکتا ہوں میں

تیری باتیں ہیں کہ ساون کی پھسلتی بوندیں
یوں بھگوتی ہیں کہ پتوں سا ٹپکتا ہوں میں

مسکراو  تو مجھے ریت سا کر دیتے ہو
اپنے ہاتھوں سے ہی پھر آپ سرکتا ہوں میں

میری پلکوں سے تجھے باندھا ہے رب نے شاید
جس طرف دیکھوں تجھے سامنے پاتا ہوں میں

آنکھ ملتے ہی وہ آنچل سے الجھ جاتا ہے
اس لیے جان کے آنکھوں کو جھپکتا ہوں میں

وقت بدلا ہے مگر وہ نہیں بدلا ریحان
جب بھی ملتا ہے وہ ماضی میں پلٹتا ہوں میں

خار کو پھول بنانا ہو گا

خار کو پھول بنانا ہو گا
پیار ظالم کو سکھانا ہوگا

کیوں محبت سے مجھے دیکھتے ہو
پھر مجھے چھوڑ کے جانا ہوگا

عمر ساری ہی گزر جائے گی
زخم دل کا نہ پرانا ہو گا

اتنی بے چین ہوئے جاتی ہے
آنکھ کا دل پہ نشانہ ہو گا

اس کی نظروں میں جگہ پانے کو
آنکھ میں دیپ جلانا ہو گا

خاک کو سونا سمجھتے تھے جب
تیری چاہت کا زمانہ ہو گا

یہ جو روکے نہ رکے اس کا ضرور
تیری چوکھٹ پہ ٹھکانہ ہو گا

دیر کردی بڑی آنے میں پیا
اب تمہیں لوٹ کے جانا ہو گا

جسم کا کھیت کھلا چھوڑا تھا
اب کوئی پھول نہ دانہ ہو گا

وہی اک پل جو خطا کر بیٹھے
سارے اشکوں کا بہانہ ہو گا

ہو کے آیا  ترے کوچے سےیہ دل
اب کئی دن تو ستانا ہو گا

وہ مجھے چاند کہا کرتی تھی

وہ مجھے چاند کہا کرتی تھی

چاند کی طرح تنہا رہتا ہوں

جلتا اور کبھی بجھتا رہتا ہوں

چاند کی طرح سینے پہ داغ لیے پھرتا ہوں

وہ مجھے چاند کہا کرتی تھی

شاعر - انجینئر خرم مسعود - ساہیوال

بہت ہی سست طبیعت تھا میں محبت میں

 میں مر رہا تھا اچانک تمہاری یاد آئی
تمہاری یاد کے صدقے سنبھل گیا ہوں میں

بہت ہی سست طبیعت تھا میں محبت میں
تو جب سے آیا ہے دل میں بدل گیا ہوں میں

پیار کے ایسے سہاروں کی ثنا ہو کیوں کر

اے خدا تیرے نظاروں کی ثنا ہو کیوں کر
چاندنی رات ستاروں کی ثنا ہو کیوں کر

کوکھ دھرتی کی بھری سبزہ و گل سے یا رب
رنگ و خوشبو کی بہاروں کی ثنا ہو کیوں کر

جلتے صحرا کو خبر پانی کی ٹھنڈک کیا
نرم بارش کی پھواروں کی ثنا ہو کیوں کر

ماں کی ممتا میں چھپی تیری محبت یارب
پیار کے ایسے سہاروں  کی ثنا ہو کیوں کر

کسی غریب کے چولہے سا جل رہا ہے دل

پکا کے خواب کوئی پھر بہل رہا ہے دل
کسی غریب کے چولہے سا جل رہا ہے دل

نہ کوئی آس نہ سپنا نہ کوئی اپنا ہے
بس ایک درد کے ٹکڑوں پہ پل رہا ہے دل

صبح سے آنکھ کی کھڑکی سے اٹھ رہا ہے دھواں
نہ جانے کس کے تصور میں جل رہا دل

بکھر گیا وہ گلاب اور رت بدل بھی گئی
ابھی بھی خوشبو کے دھوکے میں چل رہا ہے دل

میں جم چکا ہوں  زمانے کی سرد راہوں پر
تری چھوَن کے خیالوں میں جل رہا ہے دل

ہم نہ آتے تھے دنیا میں پھر بھی ہم کو دنیا میں لایا گیا ہے

ہم نہ آتے تھے دنیا میں پھر بھی  ، ہم کو دنیا میں لایا گیا ہے

روتے روتے ہی کھولی تھی آنکھیں، عمر بھر بھی رلایا گیا ہے

تم تو ناداں ہو کرتے ہو کوشش ، ایک لمحہ ٹھہر کر نہ دیکھا
ہے مقدر کا سارا  تماشا ، تم کو پتلی بنایا گیا ہے

روشنی کی حفاظت کو جس نے ، خوں جلایا تھا سارے بدن کا
صبح آئی تو لوگوں نے دیکھا ، اس کو سولی چڑھایا گیا ہے

ساقیا تیری آنکھوں پہ قرباں ، دیکھتے ہی سرور آگیا ہے
عمر بھر کی مسافت کا قرضہ ، ایک پل میں چکایا گیا ہے

میں سمندر کو پی کر بھی پیاسا ، تیرے پہلو میں جی کر بھی تنہا
عشق کی بددعا ہو جسے وہ ، کب کسی سے منایا گیا ہے

جسم پر کوئی  قبضہ جمائے ، کوئی خوابوں خیالوں سے کھیلے
تجھ کو کھو کر یوں بانٹا ہے خود کو، جیسے ورثہ لٹایا گیا ہے

آج کسی غریب کے چولہے کی طرح

آج کسی غریب کے چولہے کی طرح

جلا ہے دل

اور ہم نے بھی

کسی غریب بیوہ عورت کی طرح

ماضی کی کسی خوشگوار یاد میں گم

اٹھنے دیا ہے دھواں بہت دیر تلک

 خرم مسعود - مکینیکل انجینیر  - ساہیوال

زندگی ہم نے گزاری ہے کہ رب جانتا ہے

زندگی ہم نے گزاری ہے کہ رب جانتا ہے
 جنگ یہ جیت کہ ہاری ہے کہ رب جانتا ہے

ہم نے دیکھا ہیں نہیں ہاتھ بٹا نے والا
ایک بس جان ہماری ہے کہ رب جانتا ہے

ہم تو بس سانس کے رشتے سے بندھے جاتے ہیں
عمر صدیوں سے تمہاری ہے کہ رب جانتا ہے

وہ جب آئے تو مجھے چین سا آجاتا ہے
ورنہ تو وہ بےقراری ہے کہ رب جانتا ہے

نظرِ بد سے تری آنکھوں کو بچانے کیلیے
جان کی نذر اتاری ہے کہ  رب جانتا ہے

میں جو بکھرا تری آنکھوں نے سمیٹا مجھ کو
 تم نے یوں عمر سنواری ہے کہ رب جانتا ہے

ہار کر ہم نے ترے ہاتھ پہ قسمت رکھ دی

عمر بھر تم نے جدائی کی جو صورت رکھ دی
ہار کر ہم نے ترے ہاتھ پہ قسمت رکھ دی

ہم کو آتا ہی نہ تھا تجھ سے بدل کر جینا
خود فریبی کو ذرا دل میں عداوت رکھ دی

حوصلہ مجھ میں نہ تھا تیرے  قریب آنے کا
تو نے  تو راہ میں ہر سمت محبت رکھ دی

درد آیا تھا  کوئی چاند سا چہرہ اوڑھے
ہم نے قدموں میں دل و جان کی دولت رکھ دی

اب مقدر کے سبھی وار میں سہہ لیتا ہوں
میرے محبوب نے مجھ میں وہ اذیت رکھ دی

سال ہا سال سے زندہ ہوں  مگر پھر بھی کیوں
مجھ کو لگتا ہے کہ ہر سانس امانت رکھ دی

یقیں مجھ کو نہیں آتا

بٹی ہے ذات یوں میری ، یقیں مجھ کو نہیں آتا
ابھی تک سانس ہے باقی ، یقیں مجھ کو نہیں آتا

پکڑ کر ہاتھ سورج کا ، میں سایہ ڈھونڈنے نکلا
ڈگر کس کی، طلب کس کی  ، یقیں مجھ کو نہیں آتا

وہ میرے سامنے تو ہے، مگر بالکل نہ ہونے سا
وہ خود آیا کہ شکل اس کی  ، یقیں مجھ کو نہیں آتا

وہ جس کی خواہشیں لے کر ، سفر کر ڈالا عمروں کا
فقط مورت تھی مٹی کی  ، یقیں مجھ کو نہیں آتا

میں تجھ کو چھو تو سکتا ہوں مگر احساس بنجر ہے
یہ محفل ہے کہ تنہائی  ، یقیں مجھ کو نہیں آتا

ہوا ہوں درد سے بے خود ، مجھے اب درد کیا دو گے
میں ہوں بھی کہ نہیں ہوں جی  ، یقیں مجھ کو نہیں آتا

کچھ ایسا وسوسہ رکھا ہے اس نے اپنے رشتے میں
کہ خود سےدیکھ لوں پھر بھی  ، یقیں مجھ کو نہیں آتا

محبت والی آنکھوں میں کبھی کاجل نہیں رہتا

لٹک جاتا ہے پلکوں سے کسی من موجی بچے سا
محبت والی آنکھوں میں کبھی کاجل نہیں رہتا

وہ پورا چاند آنکھوں سے کبھی اوجھل نہیں ہوتا

بہت  مصروف ہوتا ہوں مگر غافل نہیں ہوتا
وہ پورا چاند آنکھوں سے کبھی اوجھل نہیں ہوتا

ہزاروں ان کہی باتیں نہ جانے کتنے  سالوں کی
محبت کے سفینوں کا کوئی ساحل نہیں ہوتا

نہ جانا ہم نے حال ان کا، نہ کھولا ان پہ حال اپنا
زباں سے گر بیاں نہ ہو تو کچھ حاصل نہیں ہوتا

بھلا دوں گا سبھی کچھ میں مگر بے چین وہ آنکھیں
جنہیں گر بھولنا چاہوں تو دل مائل نہیں ہوتا

سطح پر تیرتے رہنا ، ہے چکنائی طبیعت کی

میں شاعر ہوں کبھی بھی میں، کسی میں حل نہیں ہوتا

دو چار سال جوانی کا ابال ہوتا ہے

دو چار سال
 جوانی کا ابال ہوتا ہے
پھر ساری عمر
 ہلکی آنچ پہ پکتی ہے
اول اول
سب کا ہی خیال ہوتا ہے
آخر آخر
 خود سے بھی جان جانے لگتی ہے

ابھی تو درد سویا تھا

ابھی تو درد سویا تھا
بڑی ہی مشکلوں کے بعد
کہاں سے تم چلے آئے
زمیں پہ پیر    پٹخاتے
تمہاری یاد تو دل میں
یوں پائوں دابے آتی تھی
کہ آہٹ تک نہ ہوتی تھی
پہ تم تو ڈھول جیسے ہو
یہاں اب درد سوئے کیا
ابھی تو درد سویا تھا!

مجھ کو دیوانہ بنا ڈالے گا برسات کا موسم

مجھ کو دیوانہ بنا ڈالے گا برسات کا موسم
اور پھر اس پہ غضب تیری ملاقات کا موسم

درد صدیوں کا سمٹ جائے تری ایک نظر میں
تو جو چاہے تو بدل سکتا ہے حالات کا موسم

آنکھ سے آنکھ چھلکتی ہو نشہ تیر رہا ہو
ہو نہ ہو ہم پہ بھی اک روز عنایات کا موسم

تپتے تن پر جو گرے بوند وہ موتی ہے سمجھ لو
روح میں پھول اگاتا ہے یہ برسات کا موسم

چاہنے والے مجھے بانٹ گئے مال کی صورت
میرے حصے میں فقط آیا خیالات کا موسم

کبھی یہ غم کبھی وہ غم ، بہت ہی رائیگاں گزری

کبھی یہ غم کبھی وہ غم ، بہت ہی رائیگاں گزری
ہمیشہ سوچتے ہیں ہم ، بہت ہی رائیگاں گزری

نہ ساون بھیگ کر دیکھا ، نہ تتلی کا سفر دیکھا
نہ دیکھی پھول پر شبنم ، بہت ہی رائیگاں گزری

سجائے خواب آنکھوں نے ، مگر یہ پیٹ خالی تھا
اسے بھرتے رہے ہیں ہم ،  بہت ہی رائیگاں گزری

محبت روز آتی تھی، ہمیں فرصت نہ ہوتی تھی
ہمیں تو کام تھا پیہم ،  بہت ہی رائیگاں گزری

گلابوں کو کتابوں میں سنا رکھتے ہیں دل والے
چمن سے تھا گزر کم کم ،  بہت ہی رائیگاں گزری

ہمیں تم سے اکیلے میں ذرا  اک بات کہنی تھی
پہ یہ بھی نہ ہوا ہمدم ،  بہت ہی رائیگاں گزری

بہت ہی سوچ کر ہم نے، فقط اک تم کہ چاہا تھا
مگر تم بھی وہی ظالم ،  بہت ہی رائیگاں گزری


مرے رشتے تو لاشے تھے ، جو کاندھے پر اٹھا ئے تھے
دعا ہونٹوں پہ آنکھیں نم ،  بہت ہی رائیگاں گزری

جنت کی دعائیں کون کرے

"جو میرا ہے
وہ سب تیرا ہے
جو تیرا ہے
وہ تو تیرا ہے ہی!"
کل باتوں باتوں ماں مجھ کو سمجھا رہی تھی
اور میں سوچ رہا تھا
گر سارے رشتے ماں سے ہوں
تو اس دنیا میں آکر
جنت کی دعائیں کون کرے

ساری دنیا چھانٹ کے دیکھ لی ، کوئی خاص ہے تو وہ پیار ہے

میں نےدنیا چھانٹ کے دیکھ لی ، کوئی خاص ہے تو وہ پیار ہے
بڑی پھیکی پھیکی ہے زندگی ، جو مٹھاس ہے تو وہ پیار  ہے

یوں بھرا بھرا سا ہے جی مرا ، جیسے عمر صدیوں کی جی چکا
بڑا بے طلب سا ہے رابطہ ، کوِئی پیاس ہے تو وہ پیار ہے

کئی امتحاں کئی آفتیں ، کہ قدم قدم پہ ہیں سازشیں
یہاں ہر گھڑی ہے قیامتیں ، مجھے راس ہے تو وہ پیار ہے

بڑا خود غرض سا تھا راستہ ، جانے کون کس کو کچل گیا
مجھے زندگی نے تھکا دیا ابھی سانس ہے تو وہ پیار ہے

یہ لہو لہو سا نگر ترا ، جانے کون کس کی غذا ہوا
یہاں نفسا نفسی کا ماجرا ، ذرا آس ہے تو وہ پیار ہے

نہ زمیں رہی ، نہ فلک ملا ، میں کہ درمیاں میں اٹک گیا
میں تو خود ہی خود سے بچھڑ گیا ، مرے  پاس ہے تو وہ پیار ہے

روٹھ کر زمانے سے ، میں کتاب لکھتا ہوں

شکوہ جات لکھتا ہوں ، بے حساب لکھتا ہوں
روٹھ کر زمانے سے ، میں کتاب لکھتا ہوں

ضبط کی کہانی ہے ، ہا ئے کیا جوانی ہے
اس لیے سمندر کو ، میں سراب لکھتا ہوں

آگئی میناروں پر ، اب تو گھر گھر اترے گی
آج کل محبت کو ، آفتاب لکھتا ہوں

لمس بڑھتا آتا ہے ، پھول کی طرف دیکھو
خوشبوئیں نشے میں ہیں ، میں عذاب لکھتا ہوں

روز  میری آنکھوں میں ، میری نیند روتی ہے
روز اس کے ماتھے پہ ، ایک خواب لکھتا ہوں

کہیں کوئی درد رکھا ہے

کہیں کوئی درد رکھا ہے
سینے میں ذرا اندر
شاید دل کے پہلو میں
جیسے دل دھڑکتا ہے
رات دن تسلسل سے
ایسے یہ بھی بجتا ہے
ٹن ٹن تسلسل سے

مائوں کی دعاِئیں ہیں کہ جنت کی ہوائیں

ہم نے نہ کبھی ماں کو خفا ہوتے ہوئے دیکھا
ہر وقت محبت کی دعا ہوتے ہوئے دیکھا

مائوں کی دعاِئیں ہیں کہ جنت کی ہوائیں
تپتے ہوئے رستوں کو صبا ہوتے ہوئے دیکھا

وزن کے لیے
ہوتے = ہت

پھولوں میں گندھی تیری محبت ماں جی

دن رات مرے گھر کا اجالا تم ہو
میں ڈولتی کشتی ہوں سنبھالا تم ہو

آنکھوں میں ترے رب کے کرشمے دیکھوں
دنیا میں خدائی کا حوالہ تم ہوں

پھولوں میں گندھی تیری محبت ماں جی
خوشبو سے بنا پیار کا ہالہ تم ہو

رشتوں کو رویوں پہ پرکھتے ہم ہیں
بے لوث محبت کا حوالہ تم ہو

موسم کی کڑی دھوپ میں ٹھنڈک تم سے
دکھ درد میں سکھ چین کا شالہ تم ہو

دنیا میں مرا ہونا ترے ہونے سے
جیتا ہوں تو جینے کا نوالہ تم ہو

دیکھو یہ محبت کی بیماری نہیں جاتی

چہرے سے شرافت بھی اتاری نہیں جاتی
بے کار جوانی بھی گزاری نہیں جاتی

کیوں اس کو سمجھتے ہو مداوا غمِ جاں کا
جس شوخ سے اک زلف سنواری نہیں جاتی

پاکر  تجھے دیکھا ہے گنوا کر تجھے دیکھا
دیکھو یہ محبت کی بیماری نہیں جاتی

اب عمرِ گریزاں بھی لگی ہاتھ چھڑانے
لیکن ترے جلو وں کی خماری نہیں جاتی

آنکھوں میں سجا عشق تو دل ہوس بھرا ہے
اس شہر کے مردوں کی عیاری نہیں جاتی

میں کعبے کے اندر تو وہ کافر مرے اندر
حیران ہوں کیوں کھوٹ ہماری نہیں جاتی

سرخ آنچل کوئی مل جائے مجھے درد مرے

سرخ آنچل کوئی مل جائے مجھے درد مرے
اب کے بہنے کو ہیں سب اشک مرے درد مرے

منہ چھپانے کو گھنی زلف کہیں مل جائے
چاہے پھر رات ڈھلے یا نہ ڈھلے درد مرے

روپ کندن سا وہ گر میری اماں میں آئے
رتجگے آنکھوں کے ہو جائیں کھرے درد مرے

پیار ہی پیار نگاہوں میں لیے بیٹھے ہیں
دیکھے دشمن بھی تو لگ جائے گلے درد مرے

دن کے دھکوں نے مجھے توڑ گرایا تھا ریحاں
رات نے جوڑ دیے ٹکڑے مرے درد مرے

فراغت بانٹ کھائے تو ، محبت میں سمٹ جانا

کبھی دل میں اتر جانا ، کبھی جاں سے لپٹ جانا
فراغت بانٹ کھائے تو ، محبت میں سمٹ جانا

ضروری ہے کہ کچھ دن تم ، نئے لوگوں میں گھل مل لو
پر اکتانے لگے جب دل ، تو پیچھے کو پلٹ جانا

محبت جان لیوا ہے

بہت ہی خشک میوہ ہے
محبت جان لیوا ہے

دیکھو

ڈھول جیسا تھا آدمی کوئی
میرے کانوں میں روز بجتا تھا
شور سے جاں بلکتی رہتی تھی
اور  میں شکوے لکھتا رہتا تھا
آج وہ بھی چلا گیا دیکھو
مجھ میں اب موت سی خموشی ہے
ذات میری کہ قبر ہے کوئی
جاتے جاتے بھی جان لے گیا -------- دیکھو

زندگی سوچ کر گزار نہیں

زندگی سوچ کر گزار نہیں
سوچ جذبوں کی پاسدار نہیں

اس جوانی کا کیا حساب اے رب
جس جوانی پہ اختیار نہیں

وہ کسی پر یقین کیا کرتا
جس کو خود پر ہی اعتبار نہیں

عقل سے دل کی بات مت کرنا
عقل لذت سے ہمکنار نہیں

زندگی کیا ندامتیں تجھ پر
ہم تماشائی حصہ دار نہیں

زمیں پہ رکھ کے سبھی غم، کہیں سے آ جائو

بہت حسین ہے موسم کہیں سے آ جائو
بکھرتے جاتے ہیں اب ہم کہیں سے آ جائو

پکڑ کے ہاتھ چلیں سات آسمانوں تک
زمیں پہ رکھ کے سبھی غم، کہیں سے آ جائو

چلیں گے پانی کے اوپر ہوا سے کھیلیں گے
ندی کنارے کھڑے ہم کہیں سے آ جائو

تری آواز میں بہتے ہیں ساز جھرنوں کے
بہت ہی ہو کا ہے عالم کہیں سے آ جائو

تراش لیتا ہوں صورت تری نئی ہر روز
سراب توڑ کے یک دم کہیں سے آ جائو

جانے کیا سوچ کے رویا ہے یہ بادل لوگو

جانے کیا سوچ کے رویا ہے یہ بادل لوگو
اس نے آنکھوں میں ابھی ڈالا ہے کاجل لوگو

حسن آتا رہا یوں میرے مقابل لوگو
دوست کے روپ میں جیسے کوئی قاتل لوگو

زخم کھلتے ہی گئے میرے بدن کے پل پل
اور سجتا ہی گیا عشق کا مقتل لوگو

موج درد موج جوانی نے بھٹکتے رکھا
اپنی قسمت میں کہا ں لکھا تھا ساحل لوگو

کیا کہیں کیسے کہیں حال محبت والا
باندھ کر اس نے کیے ہونٹ مقفل لوگو

مرضی سے کب تھا چلا مرضی سے رکتا کیسے
میرے پیروں میں تھی حالات کی پایل لوگو

جیسے سونے میں کوئی کھوٹ ملا کر رکھ دے

وہ اگر رونے پہ آئے تو رلا کر رکھ دے
آگ کی طرح جلے سب کو جلا کر رکھ دے

ایک لمحے میں مجھے پھول سا کومل کر دے
ایک لمحے میں مجھے خار بنا کر رکھ دے

دور جائوں تو مری سانس بھی رکھ لے ، لے کر
پاس آئے تو نیا زخم لگا کر رکھ دے

مل گیا مجھ میں وہ اب  شیر و شکر کی صورت
اس کو اب بھولنا چاہوں تو ستا کر رکھ دے

پیار میں درد ملایا ہے کچھ ایسے اس نے
جیسے سونے میں کوئی کھوٹ ملا کر رکھ دے

اب اگر اجڑے تو پھر بسنے کی صورت ہی نہیں

اب اگر اجڑے تو پھر بسنے کی صورت ہی نہیں
اور پھر یہ بھی کہ اب تیری ضرورت ہی نہیں

یہ نہیں ہے کہ تری جان کے دشمن ہیں ہم
ہاں مگر یہ کہ ذرا تم سے محبت ہی نہیں

اب اگر ہیں تو فقط وقت گزاری کے لیے
اب ترے ساتھ میں پہلی سی وہ راحت ہی نہیں

جبر خود پر بھی کیا رب سے بھی کہہ کر دیکھا
تیرے ہاتھوں میں مرے پیار کی قسمت ہی نہیں

عقل کے ساتھ رہی بات کئی برسوں تک
لیکن اب دل میں وہ پہلی سی اخوت ہی نہیں

ہاتھ پہ ہاتھ دھرے بیٹھیں ہیں ، سو بیٹھیں ہیں
کاسہ خالی ہے ،رہے ، ہم کو ضرورت ہی نہیں

کچی عمروں کی محبت کیا محبت ہے ریحاں
بحث کیا اس پہ کریں جس کی حقیقت ہی نہیں
 

چاند نے ہم کو بھگایا دائرے میں گول گول

چاند نے ہم کو بھگایا دائرے میں گول گول
چاند کو کس نے گھمایا   دائرے میں گول گول

درد کے بنتے گئے حیلے وسیلے خودبخود
غم گلے تک بڑھتا آیا  دائرے میں گول گول

بھولپن کا واقعہ ہے پھر بھی ہم کو یاد ہے
نام جب اس لب پہ آیا  دائرے میں گول گول

آپ کی آنکھوں میں سویا سا کبوتر چاہ کا
دیکھتے ہی پھڑپھڑایا  دائرے میں گول گول

چاہا کس کو مانگا کس کو کچھ غلط تو ہم بھی تھے
وقت کس محور پہ لایا  دائرے میں گول گول

میں بھی انساں ہوں مگر چھلکا اتار آیا ہوں

اپنے چہرے سے ترا چہرا اتار آیا ہوں
آنکھ سے خواب کا ہر نقشہ اتار آیا ہوں

میری صورت سے تمہیں ہوتی ہے وحشت کیونکر
میں بھی انساں ہوں مگر چھلکا اتار آیا ہوں

کہا زبان کا مڑ کر زبان کو آئے

کہا زبان کا مڑ کر  زبان کو آئے
کہ تیر لوٹ کےگویا کمان کو آئے

گرا پڑا تھا تو کہتا تھا وہ خدا ہم کو
سنبھل گیا تو ہماری ہی جان کو آئے

بے حسی

مرے سامنے ٹپ ٹپ
کسی کی شکا یت خاک میں مل رہی ہے
دھیمے دھیمے سروں میں  کسی کی سسسکی
پنکھے کی آواز میں گھل رہی ہے
اگرچہ لیمپ پہ اڑتے ہوئے پتنگے کے لیے
یہ بہت رقت انگیز منظر ہو گا
لیکن مرے لیے یہ اتنا معمولا اور غیر محسوس ہے
کہ مرے ذہن میں بس اتنا خیال آیا ہے
"رات کا ایک بج گیا ہو گا
 

یہ فطرت کے نظارے

آج سے کئی برس پہلے
پہلے ملن کی شب
بادل یوں دھاڑا تھا
جیسے کسی باپ کا جواں سال اکلوتا بیٹا
اچانک موت نے اچک لیا ہو
آسمان سے پاتال تک ایسے دھارے چھوٹے تھے جیسے
اگلے کئی برس تک آنسوئوں کے لیے پانی کم پڑ جا ئے گا
اس وقت مجھے یہ سب کچھ جشن لگا تھا
آج تجھ کو کھویا ہے تو بادل کا دکھ جانا ہے
اور سمجھ  میں آیا
 ہمارے ملنے پہ بادل کیوں رویا تھا
یہ فطرت کے نظارے
بادل موسم بجلی پھول
 انسان کے کتنے ہمدرد ہیں-
کتنے خیر خواہ ہیں –
محبوبائو ں سے بھی زیادہ!

خود سے ملنے کو تو لمحہ نہیں ملتا اب کے

 خود سے ملنے کو تو لمحہ نہیں ملتا اب کے
دوڑ ہی دوڑ ہے وقفہ نہیں ملتا اب کے

کھینچ کر ایسے بنے وقت کے بخیے کس نے
بال بھر جھول کا دھاگہ نہیں ملتا اب کے

ہاتھ رکھ دو زمین کے اوپر

ایک میں ہوں پڑا ہوں صدیوں سے
ایک دنیا کہ بدلے جاتی ہے

ہاتھ رکھ دو زمین کے اوپر
سالی پھرکی سی گھومے جاتی ہے

عمر یوں یوں گزرتی جاتی ہے

عمر یوں یوں گزرتی جاتی ہے
دل کی حیرانی بڑھتی جاتی ہے

وقت پنجے جمائے بیٹھا ہے
باقی ہر شے پھسلتی جاتی ہے

ساری باتیں نصیب کی باتیں
عقل حیلے بناتی جاتی ہے

کون ہے دفن میرے گائوں میں
یہ زمیں حسن جنتی جاتی ہے

ایک کمہار نے کہا مجھ سے
خاک پیکر بدلتی جاتی ہے

زندگی کی میعاد کیا کہیے
دھول اڑتی بکھرتی جاتی ہے

جونک

آج اک جونک سے ملا ہوں میں
عمر میں مجھ سے دوگنا ہو گی
مجھ سے کہتی کہ مجھ سے پہلے بھی
تین جسموں کا خوں نچوڑ چکی
میری آنکھوں کا رخ بدلنے کو
دکھ بھری داستاں سنانے لگی
اس کی باتوں میں کھو گیا جب میں
اس نے لہجے میں کپکپی بھر لی
اور شہ رگ پہ اس طرح جھپٹی
جیسے مرتے کی آخری ہچکی
شیر جیسے ہو بھوکا پنجرے میں
کوئی چپکے سے کھول دے کھڑکی
عمر اس کی تھی شام کا سورج
بھوک اس کی مگر یہ کہتی تھی
جونک کا پیٹ پھٹ تو سکتا ہے
جونک کی بھوک مٹ نہیں سکتی
آج اک جونک سے ملا ہو میں
عمر میں مجھ سے دوگنا ہو گی

خواب منہ زور تھے سائل کے سوالوں کی طرح

خواب منہ زور تھے سائل کے سوالوں کی طرح
درد بڑھتا ہی گیا عمر کے سالوں کی طرح

جان بے جان ہوئی جان میں جاں نہ رہی
جسم کوڑا ہوا ٹوٹے ہوئے پیالوں کی طرح

آج بھی پیار پکارے تو چلے آئیں ہم
یہ الگ بات کہ اجڑے ہیں مثالوں کی طرح

یوں گلا پھاڑ کے روتا تھا زمیں ہلتی تھی
درد پھر بھی نہ گیا دل کے حوالوں کی طرح

آنکھ میں آنچ رہے بات سے خوشبو آئے
درد گل رنگ ہے محبوب کے گالوں کی طرح

اتنا نالائق محبت کی پڑھا ئی میں وہ
نوٹ کرتا تھا مرا پیار نقالوں کی طرح

اب کوئی یاد بھی آتا ہے تو ایسے جیسے

اب کوئی یاد بھی آتا ہے تو ایسے جیسے
بے خیالی میں کوئی آنکھ سے گزرے جیسے


غیر محسوس سے لگتے ہیں سبھی لوگ یہاں
پردہِ سیمیں پہ سایوں کے تماشے جیسے


چند رشتوں کو کلیجے سے لگا رکھا ہے
ڈوبتا چاند ستاروں  کو سمیٹے جیسے


درد سے جی ہے بھرا سانس ہے بوجھل بوجھل
آخری بار کوئی دیس سے پلٹے جیسے


یوں لپیٹا ہے تجھے ہار کے جیون سارا
جانے والا کوئی بستر کو لپیٹے جیسے


اپنے اب غیر سے لگتے ہیں غیر اپنے سے
میں ہوا غیر  کہ اب غیر ہیں میرے جیسے


لا تعلق سا ہوا جاتا ہوں سب چیزوں سے
بوڑھا سورج ہو ذرا شام سے پہلے جیسے

کبھی مجھے بھی مقدر پہ ٹال رکھتا تھا

اداس چہروں پہ صبحیں اجال رکھتا تھا

تھکن کے ماروں کی سانسیں بحال رکھتا تھا

محبتوں میں وفا پر یقین تھا اس کو

تنازعات کو وہ کل پہ ٹا ل رکھتا تھا

لیے ہے ریت ارادوں کی اپنے ہاتھوں میں

جوپربتوں سے بھی اونچے خیال رکھتا تھا

تھکا دیا تری عادت نے وہ جفاکش بھی

جو روٹھ کر بھی نظر میں جمال رکھتا تھا

دبک کہ بیٹھ گیا گود میں اندھیروں کی

جو اپنے سر پہ چراغوں کے تھال رکھتا تھا

کبھی کبھی تو جھگڑتا تھا ساری دنیا سے

کبھی مجھے بھی مقدر پہ ٹال رکھتا تھا

ہزار حصوں میں تقسیم ہو گیا آخر

قصور یہ کہ میں سب کا خیال رکھتا تھا

توڑ کے پھینک دی کمان ، تیر سبھی جلا دیے

توڑ کے پھینک دی کمان ، تیر سبھی جلا دیے

دام میں جو اسیر تھے ، آج وہ بھی اڑا دیے

بحث چھڑی نصیب سے ، مان گئے نصیب کو

ہار کہ آج خواب بھی ، آنکھ سے سب گرا دیے

جو پیار کے دھاگوں سے محبوب کے پر باندھے

ہونٹوں سے زباں باندھے ، آنکھوں سے نظر باندھے

اور اٹھنے کا سوچوں تو ، بانہوں سے کمر باندھے

تتلی کا چمن والو، یوں پھول پہ  قبضہ ہے

رنگوں کو چرا کر بھی خوشبو کا سفر باند ھے

یوں پہرا لگائے ہے دن رات مرے اوپر

چپ ہوں تو بگڑ بیٹھے ، بولوں تو ٰعذر باندھے

خود غرض کہیں اس کو ، کم ظرف/عقل کہیں اس کو

جو پیار کے دھاگوں سے محبوب کے پر باندھے

دکھ درد محبت میں کے ہر رنگ میں رہتا ہے

گر ہجر جگر کاٹے تو وصل ہنر باندھے

جاری رکھ مشقِ ستم ایک ستم اور سہی

جاری رکھ مشقِ ستم ایک ستم اور سہی

اس محبت کی نظر ایک جنم اور سہی

شہر کی بھیڑ میں مجھ سے تو ہزاروں ہونگے

شوق تیرا ہے تو سر ایک قلم اور سہی

خواب کے پھول کو پیروں میں بکھر جانے دو

خواب کے پھول کو پیروں میں بکھر جانے دے

اپنے دیوانے کو رو رو کے ہی مر جانے دے

درد کی قید میں جینے کی یہ شرطیں کیسی

غم کا خنجر مری گردن میں اتر جانے دے

اپنے آنچل سے ہوا دےمرے شعلوں کو اب

راکھ کے ڈھیر کو خوشبو میں بکھر جانے دے

اس سے پہلے کہ تجھے غیر کا ہوتے دیکھوں

لے لے آنکھیں مری مجھ کو بے بصر جانے دے

بخش دو مجھ کو وجود اپنا

بخش دو مجھ کو وجود اپنا

بخش دو مجھ کو وجود اپنا کہ تم کو اس کی ْقدر نہیں ہے !

یہ بکھرے گیسو ، یہ جاگی آنکھیں ، یہ ہنستے آنسو ، یہ روتی سانسیں

اور بے قراری کی دھول تھامے

 یہ تیرے پیروں سے لپٹی راہیں

بدن میں کھلتے گلاب چاہ کے

ہجر کی گرمی میں جل رہے ہیں

بھولی آشا کے ننھے جگنو ، اندوہِ حسرت میں پل رہے ہیں

کھل رہی ہیں بقا کی گرہیں دل کہیں ہے تو جاں کہیں ہے

بخش دو مجھ کو وجود اپنا  کہ تم کو اس کی ْقدر نہیں ہے !

بدن کا تیرے میں خلیہ خلیہ

 کچھ ایسے چوموں گلاب کر دوں

کٹورے ہونٹوں سے پی کے شبنم

رگوں میں تیری شراب بھر دوں

تیری آنکھوں میں جھانک لوں جو

چاند تاروں سے خواب کر دوں

یہ آب زم زم سی باتیں تیری

سنوں تو رشکِ ثواب کر دوں

آئو کہ پہلو میں آ کے بیٹھو، تمہاری جنت و جاں یہیں ہے

بخش دو مجھ کو وجود اپنا  کہ تم کو اس کی ْقدر نہیں ہے !