خواب کے مکینوں کا

خواب کے مکینوں کا
ہم سے بے زمینوں کا
نظریہ عقیدہ کا
اپنی کیا دلیلیں ہیں
ریت کی فصیلیں ہیں
ہم تو زرد پتوں سے
خواہشوں کے جھونکوں پر
رقص کرتے رہتے ہیں
جس طرف بھی لے جائے
موج جذبہ دل کی
بے لگام چلتے ہیں
عقل بھیگی بلی سی
بعد میں بلاوجہ
اپنا بھرم رکھنے کو
بحث کرتی رہتی ہے

غرور ٹوٹا ہے عاشقی کا غمِ زمانہ کا اثر دیکھو

غرور ٹوٹا ہے عاشقی کا غمِ زمانہ کا اثر دیکھو
جو سورما تھے وہ زیرِ پا ہیں گزرتے سالوں کا جبر  دیکھو

پوچھے کوئی تو کیا کہیں کیسی تھی زندگی

 پوچھے کوئی تو کیا کہیں کیسی تھی زندگی
دن رات اک مدار میں چلتی تھی زندگی

یہ کیا کہ صرف پیٹ کو بھرتے گزر گئی
ہم نے تو کوئی اور ہی سوچی تھی زندگی

اک حسنِ یار تھا کہ جچا چند روز تک
ورنہ تو بے سواد تھی پھیکی تھی زندگی

تقدیر پہ وفا پہ محبت پہ عشق پہ
تھا جن کو ناز ان کی ہی  بگڑی تھی زندگی

خوابوں کی سرزمیں پہ بھٹکتی رہی حیات
سایوں کا ہاتھ تھام کے چلتی تھی زندگی