میرے سورج کی کشش باندھ نہ پائی مجھ کو

ہم نے چپ چاپ جیے جانے کی عادت پا لی

تم نہ مل پائے تو دنیا کی حقیقت پا لی

اب بھی بیٹھیں تو فقط سوچتے رہتے ہیں تجھے

عشق پایا کہ مفکر کی طبیعت پا لی

ایک لمحہ جو ترے پیار نے بخشا تھا کبھی
ہم نے اس لمحے میں سو سال کی مدت پا لی

ہم کو معلوم ہے بے تاب سے پھرتے ہیں یہاں
لوگ کہتے ہیں کہ مرحوم نے جنت پا لی

میرے سورج کی کشش باندھ نہ پائی مجھ کو
سو خلائوں میں بھٹک جانے کی قسمت پا لی

ہم نے کچھ دیر ترے عشق سے غفلت کی تھی

بھاپ سا بکھرا تھا سمٹا تو وہ بادل ہو گیا

چاند کے بیچ میں چپکے سے جو حائل ہو گیا

ہم نے کچھ دیر ترے عشق سے غفلت کی تھی

دیکھتے دیکھتے نظروں سے تو اوجھل ہو گیا

وہ محبت میں تعلق کا طلبگار تھا بس

ہم نہ آئے تو کسی اور کا ساحل ہو گیا

میں بھی سمجھوں کہ یہ بدلی سی ادائیں کیوں ہیں؟

کون ہے وہ جو تری روح میں شامل ہو گیا

اب تو معمول سا لگتا ہے محبت میں ریحاں

جو بھی چاہا وہ کسی اور کو حاصل ہو گیا

دیکھیے مقدر کی عمر کتنی ہوتی ہے

زندگی ہماری بھی راستے کی کھیتی ہے

اک طرف مقدر ہے، روز روندھ جاتا ہے

اک طرف ہماری ضد، روز کاشت کرتے ہیں

دیکھیے مقدر کی عمر کتنی ہوتی ہے!

یہ برس مگر کوئی اور ہے

وہی آپ ہیں وہی خواب ہے، یہ برس مگر کوئی اور ہے

وہی حسن و عشق و شباب ہے ، یہ برس مگر کوئی اور ہے

کبھی زیر لب، کبھی آنکھ سے ، کبھی مسکرانے کی اوٹ سے

وہی دھیما دھیما خطاب ہے ، یہ برس مگر کوئی اور ہے

مری جیب میں مرے ہاتھ میں، یہ جو عمر بھر کی کمائی ہے

تری اک نظر کا حساب ہے، یہ برس مگر کوئی اور ہے