بے حسی

مرے سامنے ٹپ ٹپ
کسی کی شکا یت خاک میں مل رہی ہے
دھیمے دھیمے سروں میں  کسی کی سسسکی
پنکھے کی آواز میں گھل رہی ہے
اگرچہ لیمپ پہ اڑتے ہوئے پتنگے کے لیے
یہ بہت رقت انگیز منظر ہو گا
لیکن مرے لیے یہ اتنا معمولا اور غیر محسوس ہے
کہ مرے ذہن میں بس اتنا خیال آیا ہے
"رات کا ایک بج گیا ہو گا
 

یہ فطرت کے نظارے

آج سے کئی برس پہلے
پہلے ملن کی شب
بادل یوں دھاڑا تھا
جیسے کسی باپ کا جواں سال اکلوتا بیٹا
اچانک موت نے اچک لیا ہو
آسمان سے پاتال تک ایسے دھارے چھوٹے تھے جیسے
اگلے کئی برس تک آنسوئوں کے لیے پانی کم پڑ جا ئے گا
اس وقت مجھے یہ سب کچھ جشن لگا تھا
آج تجھ کو کھویا ہے تو بادل کا دکھ جانا ہے
اور سمجھ  میں آیا
 ہمارے ملنے پہ بادل کیوں رویا تھا
یہ فطرت کے نظارے
بادل موسم بجلی پھول
 انسان کے کتنے ہمدرد ہیں-
کتنے خیر خواہ ہیں –
محبوبائو ں سے بھی زیادہ!

خود سے ملنے کو تو لمحہ نہیں ملتا اب کے

 خود سے ملنے کو تو لمحہ نہیں ملتا اب کے
دوڑ ہی دوڑ ہے وقفہ نہیں ملتا اب کے

کھینچ کر ایسے بنے وقت کے بخیے کس نے
بال بھر جھول کا دھاگہ نہیں ملتا اب کے

ہاتھ رکھ دو زمین کے اوپر

ایک میں ہوں پڑا ہوں صدیوں سے
ایک دنیا کہ بدلے جاتی ہے

ہاتھ رکھ دو زمین کے اوپر
سالی پھرکی سی گھومے جاتی ہے

عمر یوں یوں گزرتی جاتی ہے

عمر یوں یوں گزرتی جاتی ہے
دل کی حیرانی بڑھتی جاتی ہے

وقت پنجے جمائے بیٹھا ہے
باقی ہر شے پھسلتی جاتی ہے

ساری باتیں نصیب کی باتیں
عقل حیلے بناتی جاتی ہے

کون ہے دفن میرے گائوں میں
یہ زمیں حسن جنتی جاتی ہے

ایک کمہار نے کہا مجھ سے
خاک پیکر بدلتی جاتی ہے

زندگی کی میعاد کیا کہیے
دھول اڑتی بکھرتی جاتی ہے

جونک

آج اک جونک سے ملا ہوں میں
عمر میں مجھ سے دوگنا ہو گی
مجھ سے کہتی کہ مجھ سے پہلے بھی
تین جسموں کا خوں نچوڑ چکی
میری آنکھوں کا رخ بدلنے کو
دکھ بھری داستاں سنانے لگی
اس کی باتوں میں کھو گیا جب میں
اس نے لہجے میں کپکپی بھر لی
اور شہ رگ پہ اس طرح جھپٹی
جیسے مرتے کی آخری ہچکی
شیر جیسے ہو بھوکا پنجرے میں
کوئی چپکے سے کھول دے کھڑکی
عمر اس کی تھی شام کا سورج
بھوک اس کی مگر یہ کہتی تھی
جونک کا پیٹ پھٹ تو سکتا ہے
جونک کی بھوک مٹ نہیں سکتی
آج اک جونک سے ملا ہو میں
عمر میں مجھ سے دوگنا ہو گی

خواب منہ زور تھے سائل کے سوالوں کی طرح

خواب منہ زور تھے سائل کے سوالوں کی طرح
درد بڑھتا ہی گیا عمر کے سالوں کی طرح

جان بے جان ہوئی جان میں جاں نہ رہی
جسم کوڑا ہوا ٹوٹے ہوئے پیالوں کی طرح

آج بھی پیار پکارے تو چلے آئیں ہم
یہ الگ بات کہ اجڑے ہیں مثالوں کی طرح

یوں گلا پھاڑ کے روتا تھا زمیں ہلتی تھی
درد پھر بھی نہ گیا دل کے حوالوں کی طرح

آنکھ میں آنچ رہے بات سے خوشبو آئے
درد گل رنگ ہے محبوب کے گالوں کی طرح

اتنا نالائق محبت کی پڑھا ئی میں وہ
نوٹ کرتا تھا مرا پیار نقالوں کی طرح

اب کوئی یاد بھی آتا ہے تو ایسے جیسے

اب کوئی یاد بھی آتا ہے تو ایسے جیسے
بے خیالی میں کوئی آنکھ سے گزرے جیسے


غیر محسوس سے لگتے ہیں سبھی لوگ یہاں
پردہِ سیمیں پہ سایوں کے تماشے جیسے


چند رشتوں کو کلیجے سے لگا رکھا ہے
ڈوبتا چاند ستاروں  کو سمیٹے جیسے


درد سے جی ہے بھرا سانس ہے بوجھل بوجھل
آخری بار کوئی دیس سے پلٹے جیسے


یوں لپیٹا ہے تجھے ہار کے جیون سارا
جانے والا کوئی بستر کو لپیٹے جیسے


اپنے اب غیر سے لگتے ہیں غیر اپنے سے
میں ہوا غیر  کہ اب غیر ہیں میرے جیسے


لا تعلق سا ہوا جاتا ہوں سب چیزوں سے
بوڑھا سورج ہو ذرا شام سے پہلے جیسے

کبھی مجھے بھی مقدر پہ ٹال رکھتا تھا

اداس چہروں پہ صبحیں اجال رکھتا تھا

تھکن کے ماروں کی سانسیں بحال رکھتا تھا

محبتوں میں وفا پر یقین تھا اس کو

تنازعات کو وہ کل پہ ٹا ل رکھتا تھا

لیے ہے ریت ارادوں کی اپنے ہاتھوں میں

جوپربتوں سے بھی اونچے خیال رکھتا تھا

تھکا دیا تری عادت نے وہ جفاکش بھی

جو روٹھ کر بھی نظر میں جمال رکھتا تھا

دبک کہ بیٹھ گیا گود میں اندھیروں کی

جو اپنے سر پہ چراغوں کے تھال رکھتا تھا

کبھی کبھی تو جھگڑتا تھا ساری دنیا سے

کبھی مجھے بھی مقدر پہ ٹال رکھتا تھا

ہزار حصوں میں تقسیم ہو گیا آخر

قصور یہ کہ میں سب کا خیال رکھتا تھا

توڑ کے پھینک دی کمان ، تیر سبھی جلا دیے

توڑ کے پھینک دی کمان ، تیر سبھی جلا دیے

دام میں جو اسیر تھے ، آج وہ بھی اڑا دیے

بحث چھڑی نصیب سے ، مان گئے نصیب کو

ہار کہ آج خواب بھی ، آنکھ سے سب گرا دیے

جو پیار کے دھاگوں سے محبوب کے پر باندھے

ہونٹوں سے زباں باندھے ، آنکھوں سے نظر باندھے

اور اٹھنے کا سوچوں تو ، بانہوں سے کمر باندھے

تتلی کا چمن والو، یوں پھول پہ  قبضہ ہے

رنگوں کو چرا کر بھی خوشبو کا سفر باند ھے

یوں پہرا لگائے ہے دن رات مرے اوپر

چپ ہوں تو بگڑ بیٹھے ، بولوں تو ٰعذر باندھے

خود غرض کہیں اس کو ، کم ظرف/عقل کہیں اس کو

جو پیار کے دھاگوں سے محبوب کے پر باندھے

دکھ درد محبت میں کے ہر رنگ میں رہتا ہے

گر ہجر جگر کاٹے تو وصل ہنر باندھے

جاری رکھ مشقِ ستم ایک ستم اور سہی

جاری رکھ مشقِ ستم ایک ستم اور سہی

اس محبت کی نظر ایک جنم اور سہی

شہر کی بھیڑ میں مجھ سے تو ہزاروں ہونگے

شوق تیرا ہے تو سر ایک قلم اور سہی

خواب کے پھول کو پیروں میں بکھر جانے دو

خواب کے پھول کو پیروں میں بکھر جانے دے

اپنے دیوانے کو رو رو کے ہی مر جانے دے

درد کی قید میں جینے کی یہ شرطیں کیسی

غم کا خنجر مری گردن میں اتر جانے دے

اپنے آنچل سے ہوا دےمرے شعلوں کو اب

راکھ کے ڈھیر کو خوشبو میں بکھر جانے دے

اس سے پہلے کہ تجھے غیر کا ہوتے دیکھوں

لے لے آنکھیں مری مجھ کو بے بصر جانے دے

بخش دو مجھ کو وجود اپنا

بخش دو مجھ کو وجود اپنا

بخش دو مجھ کو وجود اپنا کہ تم کو اس کی ْقدر نہیں ہے !

یہ بکھرے گیسو ، یہ جاگی آنکھیں ، یہ ہنستے آنسو ، یہ روتی سانسیں

اور بے قراری کی دھول تھامے

 یہ تیرے پیروں سے لپٹی راہیں

بدن میں کھلتے گلاب چاہ کے

ہجر کی گرمی میں جل رہے ہیں

بھولی آشا کے ننھے جگنو ، اندوہِ حسرت میں پل رہے ہیں

کھل رہی ہیں بقا کی گرہیں دل کہیں ہے تو جاں کہیں ہے

بخش دو مجھ کو وجود اپنا  کہ تم کو اس کی ْقدر نہیں ہے !

بدن کا تیرے میں خلیہ خلیہ

 کچھ ایسے چوموں گلاب کر دوں

کٹورے ہونٹوں سے پی کے شبنم

رگوں میں تیری شراب بھر دوں

تیری آنکھوں میں جھانک لوں جو

چاند تاروں سے خواب کر دوں

یہ آب زم زم سی باتیں تیری

سنوں تو رشکِ ثواب کر دوں

آئو کہ پہلو میں آ کے بیٹھو، تمہاری جنت و جاں یہیں ہے

بخش دو مجھ کو وجود اپنا  کہ تم کو اس کی ْقدر نہیں ہے !

عمر آدھی گزر گئی اب تک

عمر آدھی گزر گئی اب تک

سمت کوئی نہ مل سکی اب تک

کس کو رکھنا ہے چھوڑنا کس کو

بات اتنی نہ طے ہوئی اب تک

بے یقنی یقین ہو گئی ہے

لامکانی مکاں رہی اب تک

بات اتنی کہ آس ٹوٹ گئی

ورنہ وہ شخص ہے وہی اب تک

کام سارے رہے ادھورے ہی

تجھ سے فرصت نہ مل سکی اب تک

زندہ رہنے کو خواب دیتا جا

سوئی سوئی ہے زندگی اب تک

مقدر

چاہتوں کا موسم بھی بات ہے مقدر کی

آج کل تو ویسے ہی رات ہے مقدر کی

آنکھ جب بھی اٹھتی ہے بے غرض نہیں اٹھتی

آپ کی عنایت بھی گھات ہے مقدر کی

قید میں نئے ہو تم ، شور کرنا بنتا ہے

رفتہ رفتہ سمجھو گے بات ہے مقدر کی

پچھلے خواب لے کر  کچھ  تازہ خواب دے دے گا

اس  سے بڑھ  کے اور کیا او قات ہے مقدر کی

عمر بھر زمانے سے دست و پا رہے ریحان

آج ہم نے مانا ہے ، بات ہے مقدر کی

اک کم ظرف کے ساتھ گزارا ہے آج کل

اک کم ظرف کے ساتھ گزارا ہے آج کل

ہم نے تو عمر سے ہی نکالا ہے آج کل

سایہ بری نگاہ کا لگتا ہے چاند پر

یوں بے سبب جو روٹھتا رہتا ہے آج کل

دل کو غمِ فراق کی عادت ہے اس قدر

پا کر تجھے حالات سے ڈرتا ہے آج کل

اس سے قبل کہ ٹوٹ سکیں خواب بیچ دو

شیشے کے مال کا کیا بھروسہ ہے آج کل

بیٹھیں تو سوچیں گھیر لیں ، سوچیں تو حیرتیں

محفل سجانے والا ہی تنہا ہے آج کل

ضدی پہاڑ پر کبھی اگتی ہے گھاس کیا

تم نے تو خوں چھڑک کے بھی دیکھا ہے آج کل

آنکھوں کی کور میں کوئی رستی نمی سی ہے

لہجہ ہمارا اس لیے شستہ ہے آج کل

آنکھ سے وہ خطا ہو ا ایسے

سونپ دی عمر ساری گلیوں کو

آپ پھر بھی نہ بام تک آئے

آنکھ سے وہ خطا ہو ا  ایسے

ہم جوانی کی شام تک آئے

نام تیرا زبان پر آئے

 

نام تیرا زبان پر آئے

تیر جیسے کمان پر آئے

میں محبت کی ضد کروں کب تک

ہر کوئی میری جان پر آئے

زندگی کچھ سمجھ نہیں آتی

ہم تو سہوا جہان پر آئے

تو ہے کیاری مہکتے پھولوں کی

کوئی جگنو اڑان پر آئے

شہر کا شہر دیکھ کر ہم بھی

آخراس کے مکان پر آئے

دل کی دھڑکن نے کبھی خود کو سمجھنے نہ دیا

دل کی دھڑکن نے کبھی خود کو سمجھنے نہ دیا

خول جذبوں کا جوانی نے اترنے نہ دیا

آئینہ لکھتا رہا اور ہی صورت میری 

تیری آنکھوں نے مگر دھیان بدلنے نہ دیا

بیٹھ کر سوچوں تو حیران ہوا جا تا ہوں

کہ کوئی کام بھی ڈھنگ سے تو نے کرنے نہ دیا

فیصلہ جو بھی کیا بہت ہی جلدی میں کیا

اور پھر میری انا تھی کہ مکرنے نہ دیا

میں لڑھکتا ہی گیا پستی میں پتھر کی طرح

میری قسمت نے ذرا بھر کو سنبھلنے نہ دیا

اتنی مہلت تھی کہاں ، سود وزیاں میں پڑتا

تم نے تو جنگ و جدل سے ہی نکلنے نہ دیا

اس طرح چھائے رہے مجھ پہ غموں کے سائے

جشن کے لمحوں میں بھی ٹھیک سے ہسنے نہ دیا

سب کہاں ملتا ہے دنیا کے چمن میں ریحاں

رنگ مانگے تو ہوائوں نے مہکنے نہ دیا

شعر دو چار لکھوں روز ہے عادت مجھ کو

شعر دو چار لکھوں روز ہے عادت مجھ کو

غم غلط کرنےکی پڑتی ہے ضرورت مجھ کو

مجھ کو معلوم ہے تھک ہار کہ رہ جائوں گا

پھر بھی کچھ روز تو کرنے دے بغاوت مجھ کو

ہے نشہ دل کو تعلق میں پڑے رہنے کا

چاہیے اب کوئی ناکام محبت مجھ کو

رات کیا سوچ کے کاٹوں گامیں زلفوں کے سوا

اس تصور سے ہی ہونے لگے وحشت مجھ کو

جانے کس طور سے جیتے ہیں بنا پیار کے لوگ

میں تو مرجاتا اگر دیتا وہ نفرت مجھ کو

اب کے ڈولا تو سنبھلنا مرا مشکل ہو گ

اب کے ڈولا تو سنبھلنا مرا مشکل ہو گا

ساقیا اب کے پلٹنا مرا مشکل ہو گا

اب کے نکلا تو بہت دور چلا جائوں گا

پھر ترے دیس میں آنا مرا مشکل ہو گا

زخم در زخم عبارت ہے فسانہ میرا

اس فسانے میں ٹھہرنا مرا مشکل ہو گا

توڑی اک بار قسم پھر چاہے  سوبارسہی

جام اب منہ سے ہٹانا مرا مشکل ہو گا

ایسے بیگانہ ہوا ہوں سبھی رشتوں سے ریحان

پھر وہی آس لگا نا مرا مشکل ہو گا

روندتے گئے چاند راہ میں اک چراغ کی چاہتیں لیے

روندتے گئے چاند راہ میں اک چراغ کی چاہتیں لیے

آنکھ میں ہے اب چبھ رہا دھواں، رات سر پہ ہے وحشتیں لیے

عمر بھر رہی سوچ آپ کی، دیکھ کر لگا عمر آپ کی

سوچنا غلط ، دیکھنا غلط ، چپ کھڑے ہیں اب حیرتیں لیے

آنکھ آپ کی جھا نکتی رہے ، جس طرف چلوں راہ روک دے

پیار سے تکے اس طرح مجھے جیسے پوجا کی حسرتیں لیے

گود چاند کی، چاندنی بھری، رانی را ت کی، پھر بھی چاند کی

چاند عادتا گردشوں میں ہے چاندنی پھرے نفرتیں لیے

تم ریحان کو جانتے نہیں اس کی خواہشیں ، ہیں عجیب سی

ڈھونڈتا پھرے دھوپ رات دن ، سر پہ چھائوں کی راحتیں لیے

Bahar Pattern:  = - = - = / = - = - = / = - = - = / = - = - =
Example: وہ مزہ کہاں وصلِ یار میں  لطف جو ملا انتظار میں

درد میں اور نشے میں جینا

درد میں اور نشے میں جینا

پھنس گیا اب تو گلے میں جینا

رسم ٹھہری ہے وفا بھی شاید

عمر بھر ایک ہی لے میں جینا

ہاتھ میں ریت مقدر کی اور

آنکھ کا خواب ہرے میں جینا

ہجر میں ضبط عذابوں جیسا

وصل ہے جبر کدے میں جینا

بحث چھڑ جائے کسی بت سے جب

چپ ہی رہنا ہے بھلے میں جینا

آپ کو پاس بلا لیں تو مکاں دیکھیں گے

آپ کو پاس بلا لیں تو مکاں دیکھیں گے

شمع رکھنی ہے کہاں پھول کہاں دیکھیں گے

آپ کی آنکھیں کھڑی ہیں مرے ہر رستے میں

آپ کی آنکھوں سے ہو لیں تو جہاں دیکھیں گے

اچھا لگتا ہے جدائی میں اندھیرا ہم کو

چاند آجائے تو کمرے کا سماں دیکھیں گے

اب کہ مل جائو تو پھر ایسے سنبھالیں گےہم

سب کی نظروں سے تجھے کر کے نہاں دیکھیں گے

ہار کہ تجھ کو تری دید کا یارا کب ہے

دل مچلتا ہے تو کہتے ہیں کہ ہاں دیکھیں گے

باندھ رکھا ہے تری یاد کو تکیے سےاب 

خواب کے ساتھ محبت کا پیماں دیکھیں گے

برہوں نے ساڈا میل کرایا

برہوں نے ساڈا میل کرایا

میل وی دل نوں راس نہ آیا

پچھلے برس سی آس اک تیری

ایس برس تے تو وی پرایا

جا وے طبیبا تو ں وی ایں جھوٹا

تیری دوا نے درد ودایا

کوِئی کی جانے پِیڑ پرائی

ماں وی نہ سمجھے پیٹ دا جایا

چیت وی آیا پت جھڑاں لایا

دل دے بوٹے تے بور نہ آیا

چاروں پاسے چھا گئے نیرے

لکن لگے تے چن چڑھ آیا

ان بتوں سے امید کیا رکھنا

ان بتوں سے امید کیا رکھنا

آگئے ہو تو سر جھکا رکھنا

بات کرنا یہاں دیواروں سے

بتکدے میں نہ آئینہ رکھنا

جان و دل کی نیاز لائے ہو

جگ ہنسائی کا حوصلہ رکھنا

ایک خواہش کا ہاتھ تھامو جب

باقی خوابوں سے فاصلہ رکھنا

خون جذبوں کا ہو نہ جائے کہیں

ضبط کرنے میں ضابطہ رکھنا

خشک پتھر ہے سوچ لینا تم

جب کبھی چاند سے گلہ رکھنا

عشق میں معجزہ ضروری ہے

عقل سے پھر بھی رابطہ رکھنا

زندگی ابھی اور بھٹکے گی

زندگی ابھی اور بھٹکے گی

انتہا دیکھ کر ہی پلٹے گی

جان جانی ہے جانتے ہیں ہم

سانس کب تک گلے میں اٹکے گی

ایک لمحے میں سر قلم ہوگیا

لاش کچھ دیر تک تو تڑپے گی

وقت پانی ہے بہتا جائے گا

قسمتوں کی بساط الٹے گی

ہاتھ شل ہو گئے ستم گر کے

اب بغاوت دوبارہ مچلے گی

اب کے موسم میں درد آیا ہے

اگلے موسم بہار پلٹے گی

شعبدہ باز وقت ہے ایسا

آگ گلزار بن کے مہکے گی

خالی خالی سا مجھے لگتا ہے دل کا برتن

خالی خالی سا مجھے لگتا ہے دل کا برتن

تیرے بن شور بہت کرتا ہے دل کا برتن

تیری آنکھوں کی ضرورت ہے بڑی شدت سے

تیری آنکھوں سے فقط بھرتا ہے دل کا برتن

آنکھ پھیری ہے مرے سا قی نے جب سے مجھ سے

بھوکے بچے کی طرح روتا  ہے دل کا برتن

رقص کرتا ہوا جب درد کا موسم آئے

ٹوٹی ڈھولک کی طرح بجتا ہے دل کا برتن

جب کوئی مجھ کو بلندی سے پکارے ریحان

کچے پیالے کی طرح ڈرتا ہے دل کا برتن

شکوہ

شکوہ

چھوٹا سا شکوہ ہے

پاگل سی شکایت ہے

اے مری جان ِ ادا

ہلکی سی گزارش

آئیندہ جب بھی

خود کو دیکھو

تو اپنی آنکھوں سے مت دیکھو

دنیا والوں سے مت پوچھو

جھوٹے ہیں جہاں کے آئینے

اندھے ہیں لوگ سارے

انہیں کیا پتہ

انہیں کیا خبر

جب بنائی گئی ہوں گی

ساحر سی آنکھیں تیری

تو مصور نے قلم توڑ دیا ہو گا

جب تراشے گئے ہوں گے

نازک سے ہونٹ تیرے

تو کلیوں نے کھلنا چھوڑ دیا ہو گا

جب سجائی گئی ہو گی

چاہِ زقن سی تیری ٹھوڑی

کتنے سوئے ہوئے بوسوں نے

انگڑائی لی ہو گی

زلفوں کی کالی رات پہ

روشن سی پیشانی تیری

جب چاند بن کے اتری ہو گی

آسمان کے چاند پہ تب داغ لگا ہو گا

آب زم زم سے دھلے

گل و گلزار سے رخسار تیرے

جب بے نقاب ہوئے ہوں گے

تو ہر دیکھنے والی آنکھ میں

عبادت کا نشہ ہو گا

تیرے مہکیلے بدن سے

چھو جانے کی خواہش میں

ہوائوں نے اٹھکیلیوں کے ہنر سیکھے ہوں گے

شاید کہ جڑ جائیں تیرے زیور میں کہیں

یہی سوچ کر آسمان کے ستارے ٹوٹتے ہوں گے

یہ جو موسم نے ساون کی ادا سیکھی ہے

کوئی آنسو تری آنکھ سے کبھی ٹپکا ہو گا

ترے پہلو میں دبی بیٹھی ہیں

زمانے بھر کی خوشیاں

بے خیالی میں تو نے آنچل کہیں کھولا ہو گا

نہیں جاناں ---- نہیں جاناں----

نہیں تیرا بدل جاناں

بدل ہوتا جو کوئی تیرا

تجھے کب کا بھلا دیتا

ہاں جاناں ----- ہاں جاناں----

بہت انموں ہے تو جاناں

مول ہوتا جو کوئی تیرا

تجھے جگ سے خرید لیتا

چھوٹا سا شکوہ ہے

پاگل سی شکایت ہے

اے مری جان ِ ادا

ہلکی سی گزارش

آئیندہ جب بھی

خود کو دیکھو

میری آنکھوں میں جھانکو

میری آنکھوں سے دیکھو

ہم کو آنا ہے پھر خواب کے جال میں

اب گریزاں ہیں جینے کےسب راستے

وقت رکتا نہیں پیار کے واسطے

دل میں بجتی ہے جانجھر ترے نام کی

آنکھ سوئی ہوئی خواب ہیں ناچتے

ترے پہلو میں جلتے گلاب ادھ کھلے

میری آنکھوں سے اتنے پرے بھی نہیں

پھر بھی لگتا ہے کیوں مجھ کو جانِ حیا

جیسے دھرتی پہ تیرے سا ئے بھی نہیں

تم سرابوں حجابوں کے پردوں میں ہو

میں محبت کی بھٹکی کتا بوں میں ہوں

چاند کے سامنے ریت ہی ریت ہے

اور میں خواہشوں کے عذابوں میں ہوں

تیرے پیروں سے لپٹا ہے ما ضی ترا

اور میں اپنے حالات کی چال میں

زند گی ڈیٹھ ہے یو ں گزرتی نہیں

ہم کو آنا ہے پھر خواب کے جال میں

ہو سکے ایک دن یونہی آجانا تم

جیسے بھولے سے پنچھی کوئی آتا ہے

جیسے سادہ و بنجر پڑے کھیت میں

آب باراں سے سبزہ نمو پاتا ہے

چلو اب جھوٹ بولیں

چلو اب جھوٹ بولیں

بچھڑ کر جھوٹ بولیں

اپنی آنکھوں کی نمی کو

خوشی کے آنسو کہہ لیں

درد کیسا بھی اٹھے

مسکرا کے سہ لیں

کہ میری آنکھ کا ایک آنسو

تری دو آنکھوں میں

ہزاروں آنسو بھر دے گا

اور ترا ہلکا سا رونا بھی

مجھے تو مار کے رکھ دے گا

چلو اب جھوٹ بولیں

بچھڑ کر جھوٹ بولیں

افسوس تو ہوتا ہے

افسوس تو ہوتا ہے

دور دور تک پھیلے

خواب کے سراب کے

ریت بھرے صحرا میں

اک جوگی چل رہا تھا

پھٹی ہوئی جیبوں میں

چند سکے تھے کھوٹے سے

جو رستے کی پونجی تھے

اس رستے کی پونجی سے

تھوڑی نیاز خریدی تھی

چند گلاب توڑے تھے

اس کو مندر جانا تھا

---

دھول اڑ رہی تھی

جہاں تک دیکھتا تھا – دھول اڑرہی تھی

ہونٹوں کی پپڑیوں پہ

آنکھوں کی پتلیوں پہ

سر کے بالوں میں

پائوں کے چھالوں میں

جسم کی پور پور سے

خون رس رہا تھا

مگر وہ جوگی کمالِ فن سے

سچے جذبوں کا ہاتھ تھا مے

جھگڑ رہا تھا دھوپ سے

لڑ رہا تھا بھوک سے

پیاس بانٹتے سورج کا

منہ چڑا رہا تھا

چلا جا رہا تھا

کہ حوصلہ بڑا تھا اک خواب جیسے بت کا

جس کے انتظار میں

سجدے تڑپ رہے تھے

جس کی شمعِ یاد سے

اندھیرے سمٹ رہے تھے

گلے میں ڈالی مالائیں

جسے عقیدت سے جپ رہی تھیں

صدا میں اٹکی گم دٰعائیں

جس کی طلب میں تھک چکیں تھیں

مگر وہ جوگی چل رہا تھا

کہ بندگی کا خمار بڑا تھا

-----

عمر بھر کی مسافت پہ

جب وہ جوگی مندر پہنچا

تو دامن دریدہ حالت پہ

بدن دریدہ صورت پہ

مندر میں بیٹھے تمام بتوں نے

بڑے ہی زور کا قہقہہ لگایا

اور پھر یکبار برسے

حقارت کے ، دشنام کے پتھر

تہمت کے ، الزام کے پتھر

ٹھکرانے کے آلام کے پتھر

جرم یہ تھا جوگی کا

کہ اس کی پیشانی نے

اک بت کو قدموں کو

سجدوں کی خواہش میں

جوشِ عقیدت سے

خون آلود کیا تھا!!!!

----

وہ جوگی خوں کے چھینٹوں کو

اشکوں سے دھو بھی ڈالے گا

الٹی پڑی نیاز کو

بکھرے ہوئے گلابوں کو

گٹھڑی میں باندھ لائے گا

واپس لوٹ بھی آئے گا

مگر بتو ، تمہی کہو

یوں لوٹ کے آنے میں

افسوس تو ہوتا ہے!!

روز رویا نہ کرو سامنے آ کر یونہی

روز رویا نہ کرو سامنے آ کر یونہی

لوگ ہو جاتے ہیں انسان سے پتھر یونہی

لوگ آدھے کٹے پھر بھی جیے جاتے ہیں

بیٹھ جاتا ہے تو ہر بات کو لے کر یونہی

ابھی تو دشت میں آندھی کے عذاب آنے ہیں

ابھی بدلا ہے ہوائوں نے یہ تیور یونہی

ناخدائوں نے مجھے بیچ سمندر پھینکا

میں نے دیکھا تھا ابھی پیچھے کو مڑ کر یونہی

ڈھونڈنے نکلے تھے جنت کو بتوں کے پہلو میں

ہم زمانے کی نظر میں ہوئے کافر یونہی

ہم سناتے بھی تو کیا ہم کو سمجھتا کوئی

ہم سلگتے ہی رہے اندر و اندر یونہی