زندہ رہنے میں اب سہولت ہے

آپ کی انکھ میں محبت ہے
مرے فن کی یہی حقیقت ہے
شور کرتا پھروں میں گلیوں میں
کون سمجھے کہ کیا شکایت ہے
زندگی بھر جو ہم سنا نہ سکے
چار لفظوں کی اک حکایت ہے
بات اتنی ہے اور کچھ بھی نہیں
ہم کو تم سے بہت محبت ہے
تیری یادوں نے ہاتھ تھام لیا
زندہ رہنے میں اب سہولت ہے
روح کے اپنے کچھ تقاضے ہیں
جسم کی اپنی اک روایت ہے
زندگی خودبخود چلی جائے
جیسے دریا میں پات تیرت ہے
ہم ہیں انسان کیا غرور کریں
لمحہ لمحہ ہمیں ضرورت ہے
ایک شکوہ ہے مجھ کو لوگوں سے
بہت خود غرض ان کی عادت ہے

خواب آتے ہیں کسی اجنبی رہرو کی طرح

زبدگی تیری مسافت کا بھروسہ ہی نہیں
کوئی منزل کوئی چوکھٹ کوئی رستہ ہیں نہیں
خواب آتے ہیں کسی اجنبی رہرو کی طرح
ہم بھی عاشق تھے کبھی اب تو یہ لگتا ہیں نہیں
ایک بس شور ہے لفظوں کا وفا بھی اپنی
سچ تو یہ ہے تجھے دل  سے کبھی چاہا ہی نہیں
ہم کو عادت ہے محبّت میں پڑے رہنے کی
ہجر کے درد کے بن اپنا گزارا ہی نہیں
تیری فرقت ہی مداوا ہے دلِ وحشی کا
وصل کی قید تو ظالم کو گوارا ہی نہیں
بے نیازی ہے خماری ہے کہ مایوسی ہے
اب کسی شے کا طبیعت کو تقاضا ہی نہیں
کوئی تمہید تعارف نہ خلاصہ اس کا
عمر کا کھیل کسی شخص نے سمجھا ہی نہیں

ایک مدّت سے مجھے وہم ہے زندہ ہوں میں

اک جھلک دیکھ لوں تم کو تو یقیں آجائے

ایک مدّت سے مجھے وہم ہے زندہ ہوں میں

اکثر یہی سوچا ہم نے

تیری یاد آئی تو اکثر یہی سوچا ہم نے
کیسے ہوتے ہوں گے وہ لوگ جو مل جاتے ہیں

چاند کہا تھا تمہیں

چاند کہا تھا تمہیں
سو چاند ہی ہو گئے
ہماری پہنچ سے دور
آسمانوں میں
ستاروں کے بیچ
سر اٹھا کے دیکھوں
تو پگڑی گر جائے

حسن والے تیری نازش پہ ہنسی آتی ہے

زندگی تیری نوازش پہ ہنسی آتی ہے
رونے والوں کو جوں بارش  پہ ہنسی آتی ہے
ہیں کہاں اپنے نصیب ایسے کہ مل پائیں ہم
آنکھ کو خواب کی سازش  پہ ہنسی آتی ہے
اس زمانے میں محبت کا تقاضا ہے اسے
دل کی معصوم سی خواہش  پہ ہنسی آتی ہے
اک نظر میں ہی تری عمر کا سودا ہو گا
حسن والے تیری نازش  پہ ہنسی آتی ہے
کاسہ جب ٹوٹ گیا ہے تو جواب آیا ہے
یار کی چشمِ نوازش  پہ ہنسی آتی ہے

کیوں پھر سے۔۔۔۔۔

ہماری آنکھوں میں مر چکے ہیں
تمہاری چاہت کے خواب سارے
سلگ سلگ کے ہی بجھ گئے ہیں
عقیدتوں کے چراغ سارے
بکھر چکے ہیں گلاب سارے
فقط ہے یادوں کی راکھ باقی
محبتوں کا زوال باقی
لٹی پڑی ہے قبا غزل کی
بجھی ہوئی ہے چتا بھی دل کی
کیوں پھر سے الفت بڑھا رہے ہو
مرے ہو ئو ں کو  جگا رہے ہو

ہم نے سو بار تری طرف اچھالا دل کو

کبھی اوقات سے زیادہ نہیں ملتا دل کو
بس اسی بات کا دیتے ہیں دلاسہ دل کو
نامکمل سا کوئی خواب اسے چاہیے تھا
تو جو بچھڑا تو ترے خواب نے پالا دل کو
موت آتی ہے تو وہ آ کے جگا دیتا ہے
اس محبت نے مصیبت میں ہے ڈالا دل کو
تو نے بھولے سے جو اک بار ہمیں دیکھ لیا
ہم نے سو بار تری طرف اچھالا دل کو
ہائے وہ مل جاتا تو کس طور سے جیتے ریحان
اس تجسس نے تو بے چین ہی رکھا دل کو

ترے دیار کے لوگوں کو راس کچھ بھی نہیں

طلب ہے سات سمندر کی پیاس کچھ بھی نہیں
ترے دیار کے لوگوں کو راس کچھ بھی نہیں
سنبھالے پھرتے تھے اک خواب کتنے برسوں سے
جو آج آنکھوں میں جھا نکا تو پاس کچھ بھی نہیں
دبی دبی سی تمنا بھلا جیے کب تک
گھٹن میں قید میں جینے کی آس کچھ بھی نہیں
تمہیں  بھی سیکھنا ہو گا یہ زندگی کا اصول
جو مل گیا ہے وہی ہے ، قیاس کچھ بھی نہیں
اسے گنوا کے بھی جیتے ہیں کیا عجب ہے ریحان
جسے یہ کہتے تھے تم بن حواس کچھ بھی نہیں