ایسے مجھ کو کس کے باندھا آپ نے

ایسے مجھ کو کس کے باندھا آپ نے

سانس کا رستہ نہ چھوڑا آپ نے

دیکھتا رہتا ہوں اپنے آپ کو

آنکھ بھر کر جب سے دیکھا آپ نے

آپ کو معلوم تھا دلدل ہوں میں

پھر بھی مجھ میں پائوں رکھا آپ نے

آپ کی آنکھیں ذہانت سے بھری

پلکوں پر رکھا ہے قصہ آپ نے

تھوڑا تھوڑا روز پاس آ تے گئے

قسطوں قسطوں مجھ کو جیتا آپ نے

بن بلائے آنے والا

بن بلائے آنے والا

کتنا زعم رکھتا ہے

جیسے اس کی آمد کا

انتظار ہوتا ہو

جیسے بے قراری میں

انگلیوں کی پوروں پر

بار بار پل پل ہر دن شمار ہوتا ہو

میں خموش بیٹھا ہوں

اور مجھ میں بیٹھا ہے

نفرتوں کا موسم بھی

مجھ کو ضبط کرنے دو

مجھ کو چپ ہی رہنے دو

کہ -----

میں نے جِیب کے اوپر

ایک انگارہ رکھا ہے

جو بھڑکتا رہتا ہے

بن بلائے آنے والا

جھوٹا زعم رکھتا ہے

اس کا زعم رہنے دو

کوئی تو میری رفاقتوں میں محبتوں کی مثال ہوتا

کوئی تو میری رفاقتوں میں محبتوں کی مثال ہوتا

مری خوشی پر جو جان دیتا ، مرے دکھوں پر نڈھال ہوتا

بھنور میں اس کو میں چھوڑ جاتا کسی کے نینوں کی چاہ میں جب

تو میرے رستے کی بنتا آنکھیں ، دعائیں دیتا ، نہال ہوتا

فریب آنکھوں سے زخم کھا کر ، میں اس کی جھولی میں آکے گرتا

تو اپنے ہونٹوں سے میرے ماتھے پہ چاند لکھتا بے حال ہوتا

وہ خود تو میری پناہ میں رہتا ، مگر وہ مجھ کو آزاد رکھتا

کہ میں تو ملتا ملا تا سب سے ، اسے مرا ہی خیال ہوتا

میں بات کرتا تو میرے ہونٹوں سے لفظ چنتا گلاب مانند

خموش ہوتا تو میرے چہرے کو بوجھنے میں کمال ہوتا

********************************

میں بے وفائی میں چاند جیسا ، وہ دلربائی میں پھول جیسا

وہ گردشوں میں مجھے گنواتا ، میں اس کو خو شبو سے ڈھونڈ لاتا

Bahar Pattern: - = - = = / - = - = = / - = - = = / - = - = =

Example: گئے دنوں کا سراغ لیکے کدھر سے آیا کدھر گیا وہ – ناصر کاظمی

آدمی کی بدنصیبی

آدمی کی بدنصیبی

آستیں میں رہتی ہے

جیسے بیل آ کاس کی پیڑوں پر ہی پلتی ہے

خوشبوئوں کے ہونے سے ہی

پھول مہکے رہتے ہیں

لیکن اس خوشبو سے پھر

گلچیں بھی آتے ہیں

ہنستے بستے گلشن کی

قیمت لگنے لگتی ہے

آدمی کی بدنصیبی

آستیں میں رہتی ہے

مرد کی یہ فطرت ہے

مرد کی یہ فطرت ہے

چھوٹی چھوٹی باتوں پہ

روز کیوں جھگڑتے ہو

جلتے بجھتے رہتے ہو

شور برپا رکھتے ہو

چھوٹی چھوٹی باتوں سے

تلخیاں یوں بڑھتی ہیں

دوستی کے ماتھے پہ

سلوٹیں یوں پڑتی ہیں

زندگی کے چہرے سے

خوف آنے لگتا ہے

اعتبار رشتوں کا

سر جھکانے لگتا ہے

ایک بار سن لو نا!

تھوڑا غور کر لو نا!

مرد کی یہ فطرت ہے

قتل جیسے جرموں سے

در گزر تو کر لینا

لیکن ایسی باتوں کو

دل سے باندھ کر رکھنا

دل میں کھوٹ بھر لینا

چھوٹی چھوٹی باتوں پہ

روز کیوں جھگڑتے ہو

بات رستہ بھولنے کی ہے فقط

سوچ کی ساری حدوں میں تم نہ تھے

چاہ کے سب راستوں میں تم نہ تھے

بات رستہ بھولنے کی ہے فقط

ورنہ دل کی منزلوں میں تم نہ تھے

چال کچھ تو موسموں کی ہے ضرور

جلتے بلتے سورجوں میں تم نہ تھے

ایک نظرِ بے خودی کی دیر تھی

پھر تمہارے دوستوں میں تم نہ تھے

وقت تم سے چال کوئی چل گیا

ورنہ دل کے حادثوں میں تم نہ تھے

کتنا ملتا ہو گا رب مائوں سے

زندہ رہنے کی طلب مائوں سے

اچھا لگتا ہے یہ سب مائوں سے

رب تو دیکھا نہیں ماں دیکھی ہے

کتنا ملتا ہو گا رب مائوں سے

مرے ہمسفر مرے ہم نشیں

مرے ہمسفر مرے ہم نشیں

تری زندگی پہ نظر نہیں

یہاں دوڑ دھوپ فضول ہے

یہاں آنسوئوں کی قدر نہیں

تو اسیرِ دام نصیب ہے

کہ لکھے گئے سے مفر نہیں

ترا ہاتھ وقت کے ہاتھ میں

جسے منزلوں کی خبر نہیں

کبھی لو بلند تھی چراغ کی، کبھی رات پر بھی شباب تھا

کبھی لو بلند تھی چراغ کی، کبھی رات پر بھی شباب تھا

کبھی بٹ رہی تھی یوں بے طلب نہ سوال تھا نہ حساب تھا

تری زلف الجھی تھی پائوں سے ترا بچ نکلنا محال تھا

تری سوچ میں مرا نام تھا، تری نیند میں مرا خواب تھا

جو بکھر گیا ہے برگ برگ ، مری بے بسی کے مزار پر

کبھی خوشبوئوں سی دعائوں سے ، مجھے مانگتا وہ گلاب تھا

یہ گئے دنوں کا ہے سانحہ ، کبھی تنہا بیٹھ کے سوچنا

ابھی خواب دیتے تھے تھپکیاں ابھی چڑھتا چڑھتا شباب تھا

تجھے ضابطوں کی سزا ملی مجھے منزلوں کی خبر نہ تھی

تو کھڑا رہا مرا منتظر، مرے راستوں میں چناب تھا

میں نے پھول توڑا تھا ایک ہی وہی پھول نکلا ہے کاغذی

مجھے کہکشاں کا گمان تھا، وہ غبار ِ ریگِ سراب تھا

روز ہی توبہ روز گنہ بھی

روز ہی توبہ روز گنہ بھی

ایک بشر بھی، خوفِ خدا بھی

میرا تمہارا ساتھ ہے ایسے

جینے سے نفرت سانس لینا بھی

کانچ کی گڑیا چاند کی سوتن

تن سے لگی بھی، من سے جدا بھی

اپنا ملن بھی ، لگتا کٹھن ہی

رات اماوس، رستہ نیا بھی

جاگتے رہنا ، سوچتے رہنا

ہجر کا موسم اور خفا بھی

Bahar Patter: = - - = = / = - - = =

مثال: ہم کو محبت ڈھونڈ رہی تھی ، نام پتہ سب پو چھ رہی تھی

وہ انتظار اب نہیں جاناں

محبت کی پہلی ساعتِ دیدار سے ہی

انتظار کی شہر فصیلوں میں آگئے

جہاں باہر کی جانب

کوئی رستہ نہیں جاتا

کوئی دروازہ نہیں کھلتا

پھر ادائے انتظار ایسی

خوش فہمیوں کے جال میں آگئے

کہ محبتوں کے سبھی ذاِئقے

قربتوں کے تمام لمس

چاہتوں کے سبھی بوسے

دبے پائوں آئیں گے

کسی روز ہوا کی طرح

میری آنکھوں پہ ہاتھ رکھ کر

سرگوشی کریں گے

کانوں میں صبا کی طرح

مگر محورِ ذات کے گرد

سال جلتے رہے

جل جل گرتے رہے، کسی کرمکِ یاس کی طرح

ہر سال میں چار موسم

ہر موسم کے کتنے دن

سورج چڑھتے رہے

ڈھلتے رہے۔

دور کیا جانا

آئینوں سے پوچھ لو

چاند چہرے بھی روپ بدلتے رہے لباس کی طرح

تم نے کہا

محبت چھائوں ہے جاناں

مگر چھائوں کا تو

دھوپ سے مقابلہ ٹھہرا

موسموں سے واسطہ ٹھہرا

طویل ہوتے ہیں کبھی سائے کبھی چھوٹے ہوتے ہیں

خالی ہوتے ہیں کبھی پیڑ کبھی گھنے ہوتے ہیں

پھر ہم ہی کیوں استادہ رہیں

پنکھڑی پنکھڑی محبتوں کے

گریزاں پھول لیئے

بے کار جھگڑتے رہیں ہوائوں سے شامو سحر

لو آج ہم بھی کہتے ہیں

محبت چھائوں ہے جاناں

مگر جہاں چھائوں ہے وہیں اپنا گھائوں ہے جاناں

کسی پیڑ کے نیچے دو گھڑی جو سو لیے

تو کسی اور پیڑ کی جانب چل پڑے

کسی اور پیڑ کے دو گھڑی جو ہو لئے

تو کسی اور پیڑ کی جانب چل پڑے

سچ کہیں----

وہ پہلا پیار اب نہیں جاناں

وہ انتظار اب نہیں جاناں

کائنات ترے حسن کی

چاند چہرہ، سادگی

گلاب رنگت تازگی

زلفوں کی نرمی میں

مو بمو چھپی ہوئی، خوشبو کوئی آندھیوں سی

کہ سانس میں گھلے تو پھر

رواں رواں مہک جائے

-

دھنک سات رنگ کی

جیسے آنچل پہ ٹانکی ہوئی

یا بڑے ہی سلیقے سے

خوبصورت قرینے سے

رنگ برنگی تتلیاں ہوں

قطار در قطار لیٹی ہوئی

بات ہی کیا پیرہن کی

تیرے صندلیں پیکر پہ

پائے مالِ راہ پھول جیسے

کسی گلدان میں سجے تو پھر

برگ برگ مہک جائے

-

حسین پلکوں کی چلمن پہ

جھیل آنکھوں کے ساحل پہ

نٹ کھٹ سے کاجل کی

کج ادا سی دھار سی

اور نظر بے قرار سی

اگر کبھی اٹھے تو پھر

مکاں اور لا مکاں سے پرے

ہر بے جاں میں جاں پڑے

ذرہ ذرہ بہک جائے

-

لمحہ لمحہ مچلتے ہوئے

کبھی بند ہوتے کبھی کھلتے ہوئے

اک قوس سی بناتے ہوئے

دو ہونٹ برگِ گلاب سے

اگر کبھی گویا ہوں

تو حرف حرف شراب لگے

بات بات نکھر جائے

پتی پتی بکھر جائے

-

یہی کائنات ترے حسن کی

مری ذات کی گہرائیوں میں

کچھ اس ادا سے سرایت ہوئی

جیسے چپ چاپ سے کنویں میں

سرِ آب بھاری پتھر کوئی

اتنے ہولے سے رکھے

کہ کنویں تک کو خبر نہ ہو

اور پتھر پار اتر جائے

کہیں دور مسجد میں اذان کی آواز کے ساتھ

کہیں دور مسجد میں

اذان کی آواز کے ساتھ

پھیل گئے پوری محفل میں

احترام کے سائے

گویائی گنگ سی ہو گئی

سناٹے بولنے لگے

اور شرمگیں لہجے میں بلند ہوتے

دو صندلیں ہاتھ

چاند چہرے سے ہوتے ہوئے

کانوں کی لو تک آئے

اور ننگے سر پر عقیدتوں کا

آنچل اوڑھنے لگے

اب الفاظ کہاں سے لائیں

کہ تمہیں بتائیں

اس وقت وہ مقدس چہرہ کیسا تھا

آنکھیں تھی باادب کیسی

نور کا سویرا کیسا تھا

اسی سویرے کی پیاسی کرن تھی کوئی

جو میری آنکھوں کی سیہ رات میں تھی

بندگی کا سفر کرتے ہوئے گئی

اور چاند کے چرنوں کو چھو آئی

اور میں۔۔۔۔۔۔۔۔۔۔۔۔۔۔۔

میں اسے یوں دیکھنے لگا

جیسے کوئی نمازی ہو

انتہائے شوق کی نماز کے ساتھ

کہیں دور مسجد میں

اذان کی آواز کے ساتھ

مرے ارد گرد سجا ہوا

مرے ارد گرد سجا ہوا

جھوٹ کا اک خول ہے

کچھ اداکاری ہے ذات کی

کچھ دو رخی ہے بات کی

کتنے ہی برس بیت گئے

یہ بات نہیں ہے آج کی

بے منزل سے راستے

بے طلب سی زندگی

نہ کسی کی آرزو

نہ جستجو کسی کی

جھوٹ کے نقاب کو

گر کبھی میں کھولتا

ذات کی سچائی کو

گر کبھی میں بولتا

میرے سارے چاہنے والے

مجھے اپنا ماننے والے

مجھے چھوڑ چکے ہوتے

مروتوں کے کھوکھلے بندھن

کب کے توڑ چکے ہوتے

لیکن اس نقاب میں

اب اور جی نہیں سکتا

جب زہر ہی زندگی بنے

تو زہر پی نہیں سکتا

پر اوپر کے بہروپ کو

گر آج میں اتار بھی دوں

تو اند اور بہروپ ہے

اند اور بہروپ ہے

اند اور بہروپ ہے!

وہ ریحان جسے تم جانتے ہو

وہ ریحان تو کہیں کھو گیا

ذات کے سراب میں شاید گم ہی ہو گیا

یہ جو مشتِ غبار ہے

یہ تو اک مذاق ہے

یہ تو اک مخول ہے

بات بے بات پہ کرتے ہیں شکایت جاناں

بات بے بات پہ کرتے ہیں شکایت جاناں

بعض لوگوں کی تو ہوتی ہے یہ عادت جاناں

میرے شکوے میں ذرا دم ہے ذرا غور سے سن

مجھ کو درکار ہے تھوڑی سی محبت جاناں

ہم کہ دکھ درد میں ہنس کھیل لیا کرتے تھے

ہم اگر چپ ہیں تو ٹوٹی ہے قیامت جاناں

کتنا شکی ہے مزاجا مرا ہمدم دیکھو

میرے خوابوں کی بھی کرتا ہے حفاظت جاناں

پھر کوئی زلف ہو جس میں، میں چھپا لوں چہرہ

پھر کہیں مل جائے رخسار کی جنت جاناں

غمِ دنیا کا صلہ بھی غمِ دنیا ٹھہرا

لذتِ ہجر ہے نہ وصل کی حدت جاناں

دل سے شکوہ ہے نہ تجھ سے ہی شکایت ساقی

دل سے شکوہ ہے نہ تجھ سے ہی شکایت ساقی

تیری چوکھٹ پہ ہی مچلی یہ طبیعت ساقی

گھونٹ دو گھونٹ پیے تھے یونہی چلتے چلتے

عمر بھر ان کی چکانی پڑی قیمت ساقی

ساغرِ مے میں ملایا تھا نجانے کیا کیا

عین مستی میں بھی ہوتی ہے اذیت ساقی

لاج مے خانے کی رکھنی تھی سو ہم نے رکھی

سر کٹانے کی پرانی تھی روایت ساقی

لوگ کردار نبھاتے ہی فنا ہو جائیں

تیرے افسانے کی بنتی نہیں صورت ساقی

بعض کو جام و سبو سے نہیں فرصت ملتی

بعض کے کاسے میں ازلوں کی حقارت ساقی

آنکھ سے ابلتا ہے چشمہ کھارے پانی کا

آنکھ سے ابلتا ہے چشمہ کھارے پانی کا

دل کو بانجھ کرتا ہے چشمہ کھارے پانی کا

پیار کی کہانی ہے، درد کی زبانی ہے

پھوٹ پھوٹ بہتا ہے چشمہ کھارے پانی کا

جب کبھی محبت کا پھول کٹ کے گرتا ہے

درد چننے لگتا ہے چشمہ کھارے پانی کا

منتظر نگاہوں کے جب گلاب کھلتے ہیں

اوس بن کے گرتا ہے چشمہ کھارے پانی کا

ہوس کی زمینوں پر وصل کی بہاریں ہیں

عشق بن میں بہتا ہے چشمہ کھارے پانی کا

عورتوں کی عادت ہے بات بات رو دینا

ان کے ساتھ رہتا ہے چشمہ کھارے پانی کا

کلائی کی گھڑی

کلائی کی گھڑی

خرم زانو پہ سر رکھے چپ چاپ دیکھ رہا تھا- ٹپ ٹپ کرتے بارش کے قطرے - ---- وہ جس سرائے میں ٹھہرا ہو تھا اس کی چھت میں شگاف تھا اور بارش کا پانی فر ش کو گیلا کر رہا تھا، جب کہ خرم ایک کونے میں تھوڑی سی مر تفع جگہ پر بیٹھا تھا، اس کو معلو م تھا ٹپکنے والا پانی اس کے پاس پہنچنے سے پہلے باہر چلا جائے گا – اس لیئے وہ قطعی طور پر بے نیاز بیٹھا ہوا تھا،نہ اسے بارش سے شکایت تھی، نہ سرائے کے درو دیوار اور چھت سے غرض تھی- کیونکہ وو صرف وقت گزار رہا تھا ، اس نے سیالکوٹ جانا تھا لیکن وہ کراچی کی ریل گاڑی پر بیٹھ گیا تھا اور بیٹھتے ہی اس کی آنکھ لگ گئی تھی، جب اس کو جاگ آئی تو گاڑی صوبہ سندھ میں داخل ہو چکی تھی، وہ ہڑبڑا کر اٹھا اور ریل بابو کو ٹرین روکنے کا کہا، ریل بابو نے اسے ایک ویران سے سٹیشن پر اتار دیا جہاں کوئی چرند پرند نظر نہیں آرہا تھا، اتنے میں بارش ہونے لگی اور وہ سرائے کے اندر آ کر پنجاب جانے والی گاڑی کا انتظار کرنے لگا، خرم کی نظر اپنی کلائی پہ بندھی ہوئی گھڑی پہ تھی جو معمول سے کیہں زیادہ سست روی سے چل رہی تھی

----------------------------------------------------------------------------

ائر کنڈیشنڈ کمرے میں لیٹی ہوئی نجمہ آج پھر اپنے آپ کو دنیا کی بدنصیب ترین عورت سمجھ رہی تھی، اس کو غصہ آ رہا تھا زندگی پر اور زندگی سے وابستہ ہر چیز پر جو اس کے حلقہِ نظر میں تھی، وہ آج پھر خود کشی کی کوشش کر چکی تھی اور اس کوشش میں ناکام ہونے کے بعد وہ شیشے کے تین گلاس ، ایک جگ، ایک موبائل فون اور اپنے شوہر ارسلان کی عینک توڑ چکی تھی جب اس پر بھی اس کا غصہ ٹھنڈا نہ ہوا تو اس نے اٹھ کر ارسلان کا بٹوا الماری سے نکالااور اس میں پڑی ہوئی ساری نقدی کو ریزہ ریزہ کر کے فرش پر بکھیر دیا، اس کے بعد اس نے ایٹی وان کی دو گولیاں نگلیں اور کمبل اوڑھ کر لیٹ گئی، وہ مسلسل رو رہی تھی اور اس کے رونے کی سسکیوں کی آواز نےپورے کمرے کے ماحول کو ایسے سوگوار کیا ہوا تھا جیسے زندگی ایسی غار میں چلی گئی ہے جہاں پر نہ روشنی ہے اور نہ ہی واپسی کا کوئی راستہ- ارسلان صوفے پربیٹھا نجمہ کی انکھوں سے بہتے ہوئے آنسوئوں کے دھارے کو ایسے دیکھ رہا تھا جیسے یہ کوئی نمکین پانی کا چشمہ ہو جس کو نہ تو بند کیا جاسکتا ہے اور نہ ہی اس سے کھیتوں کو سیراب کیا جا سکتا ہے، بلکہ اس کا رخ بنجر زمین کی طرف موڑ دیا جاتا ہے- نجمہ سے شادی ارسلان نے اپنی مرضی سے کی تھی، اگرچہ اس میں ارسلان کی اپنی پسند شامل نہیں تھی- ارسلان کا یہ فیصلہ اس کے اس مفروضے کے مرہونِ منت تھا کہ اس کی کوششوں سے کسی کی یاسیت اور اداسی ابدی خوشی میں بدل سکتی ہے، نجمہ کو مرگی کے دورے پڑتے تھے اور آدھے سر کا درد رہتا تھا، وہ اکثر و بیشتر نیند کی گولیاں کھا کر خود کو قریب المرگ کر لیتی تھی - ڈاکٹرز کا کہنا تھا کہ اس کی وجہ گھریلو تنائو ہے- نجمہ اس کا الزام اپنے والد کے سر تھوپتی تھی او ر ہر وقت اس کے ظلم و ستم کے ْرونے روتی تھی- وہ ارسلان سے عشق کرتی تھی اور بظاہر اس کی خود کشیوں کی وجہ ارسلان سے ناقابلِ برداشت دوری تھی،- نجمہ کا تکیہ کلام تھا کہ اگر اس کو ارسلان کا قرب ، نام، اور عزت کی چھت مل جائےتو وہ ساری عمر ارسلان کی داسی بن کر گزار سکتی ہے-آج کی لڑائی کی وجہ ارسلان کا دوست خرم تھا جو سیالکوٹ آرہا تھا اور اس کوناشتہ کروانے کے بعد ارسلان نے اسے ائر پورٹ پر چھوڑنے جانا تھا-اور یہ اتنی سی بات نجمہ کو پسند نہیں تھی-اول اول تو ارسلان نے نجمہ کےہر درد کا مداوا تلاش کرنے کی کوشش کی لیکن پھر اس کو احساس ہو گیا کہ دنیاوی متاع و زر سے حقیقی خوشی اور قلبی سکون نہیں خریدا جا سکتا-اس نے آج ہی سنڈے میگزین سے ایک حدیث پاک پڑھی تھی جس کا مفہوم تھا کہ کوہِ احد اپنی جگہ سے ٹل سکتا ہے لیکن آدمی کی سرشت نہیں بدل سکتی- نجمہ ایک بے چین روح تھی جس کے لہو کی بوند بوند میں حسد ، لالچ اور اضطراب کی آمیزش تھی- ارسلان کو اب نہ تو نجمہ کے آنسوئوں اور سسکیوں سے غرض تھی اور نہ ہی اس کی ناراضگی کا خیال- اسے پتہ تھا کہ وہ غلط گاڑی پر سوار ہے جس کی کوئی منزل نہیں- ابھی کچھ دیر میں نجمہ روتی روتی سو جائیگی اور صبح پھر کسی نئی بات پر جھگڑا ہو گا- اگرچہ خرم سے ملے ایک سال بیت گیا تھا اور خرم اس کا یارِغار تھا، پھر بھی ارسلان دعا مانگ رہا تھا کہ کاش خرم کل سیالکوٹ نہ آئے- ارسلان کی نظر اپنی کلائی پہ بندھی ہوئی گھڑی پہ تھی جو معمول سے کیہں زیادہ سست روی سے چل رہی تھی

درد

ہم نے درد پالا ہے

اپنی گود میں ایسے

جیسے بانجھ عورت کی

کوکھ کا یہ بچہ ہو

اور اس کو کھونے کا

ہر گھڑی ہی خدشہ ہو

بہت عجیب سا لگتا ہے غم زمانے کا

بہت عجیب سا لگتا ہے غم زمانے کا

ترا رقیب سا لگتا ہے غم زمانے کا

نہ وہ حجاب سی پلکیں نہ کوئی دلجوئی

تہی نصیب سا لگتا ہے غم زمانے کا

اس حسن کے جلووں میں چھپا اور ہی کچھ ہے

اس حسن کے جلووں میں چھپا اور ہی کچھ ہے

نینوں کی زباں اور، ادا اور ہی کچھ ہے

ہم گھر کو جلا لیں گے اگر چاندنی روٹھی

دہکے ہوئے شعلوں کی ضیا اور ہی کچھ ہے

خوابوں کو پرکھنے کی تو ضد کرتا ہے کیونکر

ہے اصل میں کچھ اور، سنااور ہی کچھ ہے

چلتا ہے محبت کے سفر پر تو یہ سن لے

آغاز ہے پھولوں سا، رسا اور ہی کچھ ہے

ہم دشتِ محبت میں بسے ہیں تو یہ جانا

دعووں کا چمن اور ،وفا اور ہی کچھ ہے

اشکوں کی قطاروں سے کبھی درد نہ ماپو

لالچ بھری نظروں کی نوا اور ہی کچھ ہے

جو عشق میں مرتا ہے اسے جا کے یہ کہنا

یہ عشق تو امرت ہے قضا اور ہی کچھ ہے

تجھے بہت بھولنا چاہا جاناں

تجھے بہت بھولنا چاہا جاناں

تجھے بہت بھولنا چاہا

جب بھی یاد آئی تیری

یہی سوچ کے چپ ہو لیئے

چلو آخری بار ہے

دل کی کشتِ ویراں کو سیراب کر لیں

خوابوں کی نگری آباد کر لیں

جی بھر کے یاد کر لیں

چلو آخری بار ہے

گریز پا لمحوں کو لفظوں میں جکڑ لیں

تخیل میں کھیلتے

تری سیہ آنکھوں کے

جگنو پکڑ لیں

جب بھی قدم بڑھے میرے

تیرے ہی شہر کی جانب بڑھے

مگر بڑھتے ہوئے قدموں پہ زنجیر سی ڈالےرکھی

بھول جائیں گے تجھے بھول جائیں گے، یہی آس پالے رکھی

وقت کے سمندر میں میں یہہی کشمکش رہی،

کبھی تیری یاد کا جزیرہ، کبھی زندگی کی پتوار کا سہارا

نہ جزیرے پہ ٹھہر سکے

نہ پتوار چلا سکے

نہ مزل کو پاس بلا سکے

نہ خود ساحل پہ جا سکے

 نہ کسی اور کو اپنا سکے

نہ تجھی کو بلا سکے

تجھے ًبھلاتے بھلاتے خود کو بھلا دیا

سب کچھ مٹا دیا

تیری یاد نہ مٹا سکے

تجھے نہ ہم بھلا سکے

ہاں تجھے نہ ہم بھلا سکے

اے اشفاق

اے اشفاق

وہ تلقین شاہ کے قصے ، وہ توتا کہانیاں

وہ محبتوں کے افسانے اور انسانیت کے دلاسے

یہ سارے چشمے کچھ اس ادا سے پھوٹتے

کہ نہ دریا میں ملتے ، نہ سمندر میں گرتے

بلکہ دھرتی کی بانہوں میں آتے ہی

ایسے جذب ہو جاتے

جیسے دھرتی کے ہی پیاسے ہوں

یا پھر دھرتی ان کی پیاسی ہو!

اے اشفاق

تیری ضرورت تھی ابھی

تیری آنکھوں سے بہت سے رنگ چننے تھے

فیض کے شوق پڑھنے تھے، ناصر کے ہجر سننے تھے

زندگی کی بیاض میں کچھ صفحات بچا رکھے تھے

جو تیرے ہاتھوں نے بھرنے تھے

اے اشفاق

تو تو بہت باتیں کرتا تھا

کبھی خاموش نہ ہوتا تھا

ہر سوال کا جواب دیتا تھا

آج کیوں بے زباں ہو گیا

زندگی کے دوراہے پر تو بھی

اک عام سا انساں ہو گیا!!!!

اے محبت آ تجھے تلاش کرتے ہیں

اے محبت

آ تجھے تلاش کرتے ہیں

پرانی کتابوں کے صفحوں میں

چند مانوس سی سطروں میں

کچھ بے آواز لفظوں میں

وہ لفظ تو اب طاقِ نسیا ں میں دفن ہیں

مگران کے سائے، ان کے معانی

ساتھ ساتھ چلتے ہیں

اے محبت !

آ تجھے تلاش کرتے ہیں

گو زندگی کی بیاض میں

تری یادوں کے کچھ مضمون باقی ہیں

مگر ان میں کوئی بھی لفظ اپنا نہیں

کہ یہاں تو اب ہر روز

نئی تاریخ پڑتی ہے

نیا دن تحریر ہوتا

ہاں البتہ صفحہ بدلتا نہیں

ایک ہی صفحے پر

میں اور دیمک

اپنے اپنے دائرے میں

اپنے اپنے انداز میں

اپنی اپنی وفا سے لڑتے ہیں

اے محبت !

آ تجھے تلاش کرتے ہیں

مجھ کو اپنوں کا بھرم مار گیا تھا ورنہ

مجھ کو اپنوں کا بھرم مار گیا تھا ورنہ

اپنے قاتل کو میں آداب سکھاتا ورنہ

ہم محبت میں سیاست کے روادار نہ تھے

یہ جہاں ہم کو بھی مسند پہ بٹھاتا ورنہ

چور دروازوں سے آنے کی مجھے عادت نہ تھی

میں بھی منزل پہ ترے ساتھ ہی جاتا ورنہ

خون مل کے وہ بنا پھرتا ہے غازی دیکھو

وار دشمن کا وہ ہر اک سے چھپاتا ورنہ

جھوٹی ہمدردیِ احباب گوارا کب تھی

میرے زخموں پہ فلک اشک بہاتا ورنہ

تیرے چہرے کا کرب دیکھ کے پھینکا ترکش

تیری للکار کی طاقت آ زماتا ورنہ

یہ محبت ہے کیسی محبت

یہ محبت ہے کیسی محبت

بے قراری خماری اذیت

جام منہ سے لگا کر بھی ہم کو

پیاس کی ہی رہی ہے شکایت

وصل منزل نہیں ہے ہماری

عمر سے بھی بڑی ہے مسافت

خود سے ناراض رہنے لگا ہوں

تیرے نینوں نے کی ہے شرارت

حرکتیں دل کی ہیں پاگلوں سی

جیسے بچے کی مچلے طبیعت

حسن چھپتا پھرے ہے حیا سے

عشق کی دیکھی جائے نہ وحشت

ہم پہ قربان جنت کی حوریں

پھر بھی تیری رہے گی ضرورت

Pattern: = - = = / - = = / - = =

Sample: بھر دو جھولی مری یا محمد - یا - جب تک الجھے نہ کانٹوں سے دامن، کوئی سمجھے گا کیا رازِ گلشن

محبت کیا ہے اپنی

محبت کیا ہے اپنی

بس اک ضد ہےاس دل کی

کسی کو چاہتے رہنا اور چاہتے ہی چلے جانا

چاہت کے محبت کے کبھی معانی نہ سمجھ پانا

فاصلوں پہ خوش نہ قربتوں پہ راضی

محبت کیا ہے اپنی

بس اک ضد ہے اس  دل کی

کبھی اداسیوں کی ڈگر میں

کسی خوشبو سے الجھ جانا

تو کسی یادِ گلاب میں بکھرتے ہی چلے جانا

تو کبھی آنکھیں بند کر کے

سب کچھ بھول بھلا کے، بیتی ہوئی یادوں کو سہارا سا بنا لینا

جیسے وادیِ عشق میں قدم رکھ کر

ہر لحظہ پیچھے پلٹ کے دیکھتی

اک نو عمر لڑکی!

محبت کیا ہے اپنی

بس اک ضد ہےاس  دل کی

تم جو ڈھونڈتے ہو راہیں ترکِ تعلق کی

تو ڈھونڈا کرو

تم جو کرتے ہو ستم ہم پہ

تو کیا کرو

ہمیں تو رشتہ وفا توڑنا آتا ہی نہیں

اک زبانِ بے زباں ہے کہ

شناسائے شکوہ ہی نہیں

اک دلِ سرکش رکھتے ہیں

کہ بھولنا جانتا ہی نہیں

صبح سے شام ، شام سے رات، رات سے صبح

عنواں بدل بدل کے آتی ہے

فقط ایک کہانی، ایک نام ایک آس ، ایک ہی یاد تری

محبت کیا ہے اپنی
بس اک ضد ہےاس   دل کی

مرا ہمسفر یہیں تھک گیا ، ابھی مجھ کو چلنا ہے دیر تک

مرا ہمسفر یہیں تھک گیا ، ابھی مجھ کو چلنا ہے دیر تک

شروعات ہے ابھی رات کی، یہ چراغ جلنا ہے دیر تک

کہیں دھوپ ہے، کہیں دھول ہے، کئی درد ہیں کئی وحشتیں

میں محبتوں کے سفر میں تھا، یہ غبار اڑنا ہے دیر تک

کئی آسروں کو بدل بدل، تجھے کھینچ لایا ہوں زندگی

مرا جسم مر بھی چکا مگر ، ابھی دل دھڑکنا ہے دیر تک

کوئی ہاتھ ہو جیسے پھول ہو، کوئی ساتھ ہو جیسے آپ ہو

میں سفر میں عمر گزار دوں، کہ سفر مہکنا ہے دیر تک

وہ اداس آنکھ گلاب کی، جو الجھتی رہتی تھی خواب سے

وہ گئی تو نیند بھی لے گئی، مجھے چاند تکنا ہے دیر تک

دو گام پہ منزل ہے، صدیوں کی مسافت ہے

دو گام پہ منزل ہے، صدیوں کی مسافت ہے

یہ تیری محبت ہے، یا کوئی مصیبت ہے

تو سامنے بیٹھا تھا، نظروں کو شکایت تھی

تو اٹھ کہ گیا جب سے، اس دل پہ قیامت ہے

دن رات تجھے دیکھوں، سوچوں کے دریچوں میں

کیا رات سی زلفیں ہیں!، کیا دھوپ سی رنگت ہے!

ان گول سے ہونٹوں کو، جب اذنِ تکلم ہو

ہر حرف میں خوشبو ہے، ہر بات میں راحت ہے

وہ عشق تو کرتا ہے، ڈرتا ہے زمانے سے

اک پھول کی جنت ہے، سو دشت کی وحشت ہے

خموشی محبت کی زباں ہو جائے

اے محبت

ترے ہونٹوں کے ُپھولوں کے

خوشبوئو ں کے رنگوں کے

رخسار پہ اگتی صبحوں کے

آنکھوں میں ڈوبتی شاموں کے

زلفوں میں چھپتے جگنئوں کے

باتوں میں مچلتی تتلیوں کے

بہت سے گیت گائے

اے محبت

تیرے ہونٹوں

تیری آنکھوں

تیرے ماتھے میں

تیرے معصوم سے حسین چہرے کے خاکے میں

مہکتے ہوئے لفظوں سے دھنک کے رنگ سجائے

مگر اے جانِ حسن!

تیرے حسن کا سفر ہے کہ ختم ہوتا نہیں

اور عشق یہ جاگا ہے کہ اب سوتا نہیں

تیرے ہونٹوں کے اشارے

تیری آنکھوں کی زباں

رخِ کاغذ پہ اتاروں تو بھلا کیسے

عشق کے جذبے ، آہیں ، سازِ دل کے شرارے

لفظوں میں اتاروں تو بھلا کیسے

میری نظمیں۔ میری غزلیں ، میرے لفظوں کا پندار

جہاں کی ساری تشبیہیں کائنات کا ہر استعارہ

تری روشنی سے ماند سا پڑ گیا ہے

ایک تکرار سی تکرار ہے کہ قلم اڑ گیا ہے

اب تو یہی آرزو ہے کہ اک روز

یوں بارشِ حسن میں نکھر کے آئے چہرہ ترا

کہ یک دم جو کھلیں آنکھیں میری تو پتھر ہو جائیں

ہونٹ یوں دفعتا بند ہوں کہ مقفل ہو جائیں

سفید کاغذ پہ آ کر قلم ساکت ہو جائے

چار آنکھوں کے بیچ وقت جامد ہو جائے

خموشی بولتی ہو، خموشی لکھتی ہو

خموشی باتیں کرتی ہو،

گویائی ہاتھ باندھے کھڑی ہو

خموشی محبت کی زباں ہو جائے

ایک کم ظرف کو دکھایا دل

ایک کم ظرف کو دکھایا دل

آگ سے راکھ ہی بنایا دل

ایک شمع جلائی تھی دل میں

دل کے مہماں نے ہی جلایا دل

دردِدل کی دوا عبث ہے جی

ٹوٹکوں نے سگوں دکھایا دل

ضد لگاِئی ہے ساری دنیا سے

روٹھ کر سب سے اک منایا دل

نام لے کر مرا ڈرے چاہت

میں کہاں تھا کہاں پہ لایا دل

اب اسیری میں سانس لوں کیسے

باندھ کر مجھ کو چھوڑ آیا دل

تیرے ملنے کا کوئی امکاں نہیں

پھر بھی اک بت تراش لایا دل

کل محبت پہ جان دیتا تھا

آج نفرت پہ اتر آیا دل

اے محبت آج تیرے جذبات کی بات کرتے ہیں

اے محبت آج

تیرے جذبات کی بات کرتے ہیں

جو کہ

جھوٹے نینوں کی شررباری سے

سراب ہونٹوں کی پھول کاری سے

زلفِ تاباں کی ملمع کاری سے

میٹھے لہجوں کی اداکاری سے

میرے حصارِ ذات میں پنپتے رہے

خلوتِ غمِ ہجر میں

حلقہ چشم میں

بے سبب اشکوں کی طرح بھٹکتے رہے

جلوتِ رخِ ستم گر میں

نارسا آہوں کی طرح جلتے رہے

جل جل مرتے رہے

اے محبت آج

تیرے جذبات کی بات کرتے ہیں

جو کہ

مقدس تھے ایسے

جب بھی سوچتے تھے – عبادت کا گماں ہوتا تھا

زمیں تا فلک نور کا ہیولہ سا رواں ہوتا تھا

ماہتابِ داغ داغ کی پیشانی میں

چادرِ شب پہ ٹانکے نجوم کی تابانی میں

معراجِ بندگی کا سماں ہوتا تھا

اے محبت آج

تیرے جذبات کی بات کرتے ہیں

 جنہیں کہیں اماں نہ ملتی

تو لفظوں میں چلے آتے تھے

شعروں میں ڈھلے جاتے تھے

وہی اشعار جب

سرِ بزم پڑھےجاتے تھے

تو ہونٹوں سے سنے جاتے تھے

پلکوں سے چنے جاتے تھے

اے محبت آج

تیرے جذبات کی بات کرتے ہیں

انہی جذبات کو آج

تیرے حضور لایا تھا

میں نہیں لایا تھا انہیں

خوش فہمیِ شوق کے دلاسے لائے تھے

بے دود آتشِ سینہ کے شعلے لائے تھے

غیرتِ عشق کا مجروح غرور لایا تھا

وہ جذبات کے رنجیدہ تھے

رتجگوں سے زیادہ

وہ جذبات کہ سنجیدہ تھے

بے کسوں سے زیادہ

نشانہِ تضحیک بنے ایسے

کہ جان کی نیاز جیسے

کوئی رکھ دے پتھروں کے آگے

اور بے حس پتھر ہنس کے بولے

دیکھو یہ مذاق نہیں اچھا

آئندہ ایسا مذاق نہ کرنا

آپ بہت محترم ہیں میرے لیے

آئندہ ایسی بات نہ کرنا

میں ترا لاڈلا ، بگڑا ہوا ، ضدی سا بچہ ہوں

اے خدا

میں ترا لاڈلا ، بگڑا ہوا ، ضدی سا بچہ ہوں

کوئی دے دلا کے منا لے مجھ کو

یا پھر اپنے ہی پاس بلا لے مجھ کو

یہ تری دنیا اچھی نہیں لگتی مجھ کو  

نجانے کس نے تراشے ہیں اصول جینے کے

کہیں ایسا نہ ہو کہ بغاوت کر دوں

جہاں والوں سے الجھ جائوں ، کوئی وحشت کر دوں

میں جس ڈگر پہ چلا ہوں – ہٹا لے مجھ کو

کوئی دے دلا کے منا لے مجھ کو

میں بھی اک رسالہ ہوں

کچھ ذہین لوگوں کو

ناز ہے ذہانت پہ

کچھ امیر لوگوں کو

فخر ہے امارت پہ

کچھ شریف لوگوں کا

مان ہے شرافت پہ

عاشقوں کے ٹولے کو

آس ہے محبت سے

وقت کی شرارت کو

قسمتوں کی عادت کو

کون جان پایا ہے

کون جان سکتا ہے

ہم نے خود یہ دیکھا ہے

آسمانی بارش سے

لہلہاتی فصلوں کا

ٹوٹ کر بکھر جانا

ہم نے خود یہ دیکھا ہے

چاند جیسے چہروں کا

دھوپ کی تمازت سے

راکھ میں بدل جانا

ہم نے خود یہ دیکھا ہے

شبنمی ہوائوں میں

مہکتے گلابوں کا

خون خون ہو جانا

آج کے رسالے تو

میز پر ٹکائے ہیں

کل یہی رسالے پھر

روڈ کے کناروں پر

خاک پر سجے ہوں گے

آتے جاتے لوگوں کی

راہ میں پڑے ہوں گے

اور نصف قیمت پر

پھر سے بک رہے ہوں گے

میں بھی اک رسالہ ہوں

جس کی ہر کہانی کو

تم نے پڑھ لیا جاناں

اب تمہاری چاہت کا

اور میری قسمت کا

فیصلہ تو ظاہر ہے!