خزاں بہاروں پہ آ کے ٹھہری، یہ امتحاں تھا محبتوں کا

بچھڑ چکے ہیں تمام راہی، فقط ہے رستے کی گرد باقی
نہ دل رہا نہ ہی دل کا مہماں، مگر ہے سینے میں درد باقی

خزاں بہاروں پہ آ کے ٹھہری، یہ امتحاں تھا محبتوں کا
پرندے شاخوں سے اڑ گئے سب مگر رہا نخلِ زرد باقی

مرے تصور سے تیری یادیں بھی باری باری ہوئی ہیں رخصت
نہ آس کوئی نہ پاس کوئی،  بس ایک ہے آہِ سرد باقی

ہمارے دل کی تمام الجھن تمہاری چاہت کے واسطے تھی
تمہی نے دامن چھڑا لیا جب، نہ دل بچا نہ ہی درد باقی

وہ غمگسار یقینا کسی عذاب میں ہے

کئی دنوں سے ہے خاموش کچھ خبر ہی نہیں

وہ غمگسار یقینا کسی عذاب میں ہے

تمہارا چہرہ کسی اجنبی نے پہنا ہے

جسے فلک نے سنوارا وہ شخص اور ہی تھا
جو چاند سے بھی تھا پیارا  وہ شخص اور ہی تھا

تمہاری راہ سے گزرے بہت سے لوگ مگر
جو ہمسفر تھا تمہارا  وہ شخص اور ہی تھا

محبّتوں کے مراسم سبھی کے ساتھ سہی
جو جان میں تھا اتارا  وہ شخص اور ہی تھا

گزار لیتے تھے ہم وقت سب کے ساتھ مگر
نہ جس کے بن تھا گزارا  وہ شخص اور ہی تھا

میں بول بول کے تھک جائوں کوئی سمجھے نہ!
جو جان لیتا اشارہ  وہ شخص اور ہی تھا

تمہارا چہرہ کسی اجنبی نے پہنا ہے
جو دل جگر تھا ہمارا  وہ شخص اور ہی تھا

وہ پاگلوں سا مرے ارد گرد پھرتا تھا

گئے وہ دن کہ مری اک نگاہ کے بدلے
وہ پاگلوں سا مرے ارد گرد پھرتا تھا

وگرنہ جیتا ہے ہر کوئی زندگی اپنی

ہمیں گماں ہے کہ  ہم ایک ساتھ رہتے ہیں
وگرنہ جیتا ہے ہر کوئی زندگی اپنی

قسم خدا کی محبت کے سلسے ہیں عجیب

قسم خدا کی محبت کے سلسے ہیں عجیب
جو جان سے ہو قریب اس کو اجنبی کہنا!

تلاشِ رزق نے سب فیصلے بدل ڈالے

کچھ اور سوچ کے آیا تھا اس جہاں میں مگر

تلاشِ رزق نے سب فیصلے بدل ڈالے

ندی کا پانی ہوں گدلا مجھے نہ کیجے گا

ندی کا پانی ہوں گدلا مجھے نہ کیجے گا
کہ میری راہ میں تم جیسے اور بھی ہیں ابھی

دو چار سال جو ہوتے تو مان جاتے ہم

 وہ آنکھ ہو گی پرائی ، سہی نہ جائے گی
اسیرِ دل کی رہائی سہی نہ جائے گی
دو چار سال جو ہوتے تو مان جاتے ہم
یہ عمر بھر کی جدائی سہی نہ جائے گی

جو خواب آنکھ نے دیکھا وہ اس زمیں کا نہ تھا

جنوں تھا عشق تھا تجھ سے بڑی محبت تھی
جو شاعری میں لکھی جائے ایسی چاہت تھی
تجھے گنوا دیا حالات کا ستم کہیے
کہ اپنے بیچ میں بس دو قدم مسافت تھی
جو خواب آنکھ نے دیکھا وہ اس زمیں کا نہ تھا
کہ ایسے خواب کی تعبیر تھی تو جنت تھی!
تو کائنات کی وسعت میں رہ گیا تنہا
کہ تیری جیب میں دولت نہ تھی محبت تھی
کسی کے ساتھ میں چلتا تو کس طرح چلتا
کہ پیار کرنا بھی دل سے نہ تھا ضرورت تھی
جسے کرید کے دیکھا وہی ادھورا تھا
اسی لیے مجھے تنہائیوں کی عادت تھی
میں اس جہاں کا نہیں تھا اسی لیے شاید
مری حیات مسلسل مجھے اذیّت تھی

مگر یہ کیا ہوا ہم کو

تمہیں ہی سوچتے رہنا
بہت بے کار سے پھرنا
بڑے ہی سست سے ہو کر
خیالوں میں تجھے لا کر
کھٹولے پر پڑے رہنا
یہ عادت تو کبھی نہ تھی
کہ ہم تو زندگانی کے سمندر سے
دوانہ وار لڑتے تھے
بہائو کے مخالف بھی
بڑے گردے سے چلتے تھے
مگر یہ کیا ہوا ہم کو
کہ جب سے تم سے بچھڑے ہیں
یہ بازو ڈھیلے چھوڑے ہیں
سمندر سے یہ کہتے ہیں
ہمیں پاتال تک لے چل
کہ ہم نے موت سے پہلے زمیں کی پستیوں کی آخری حدوں کو چھونا ہے
دل وحشی کا مفروضہ !
کہ ہم کو ڈوبتا دیکھے تو شاید لوٹ آئے وہ!
دلِ وحشی تو پہلے بھی
بہکتا تھا بھٹکتا تھا
مگر یہ کیا ہوا ہم کو

ہر اک لمحہ خیال آئے کہ تو ہوتا تو یوں ہوتا

ہر اک لمحہ خیال آئے کہ تو ہوتا تو یوں ہوتا
یہ حسرت ہی رہی ہائےکہ تو ہوتا تو یوں ہوتا
زمانہ جب کبھی ہم سے نہایت بے رخی کر دے
تو دل رہ رہ کے جتلائے کہ تو ہوتا تو یوں ہوتا

یہ عمر لمحوں میں کٹتی بڑی طویل لگے

تری کمی کا ہے احساس مجھ کو پر لمحہ 

یہ عمر لمحوں میں کٹتی بڑی طویل لگے

سب غرض کے بندے ہیں

دنیا کی حقیقت کیا
سب غرض کے بندے ہیں
یہ عشق محبت تو
رسمیں ہیں دوانوں کی
باتیں ہیں فسانوں کی
تم پیار کے سودائی
کس بھول میں پھرتے ہو
اس مطلبی دنیا میں
ہو شخص ہی تنہا ہے
ہر شخص ہے ہرجائی
سب وعدے محبت کے
اور قسمیں نبھانے کی
لفظوں کے پلندے ہیں
اور لفظ منافق ہیں
ہرشخص نے جسم اپنا
کندھے پہ اٹھایا ہے
اس جسم کو ہر لمحہ
سانسوں کی ضرورت ہے
کھانا ہے کبھی پینا
اٹھ کرہے کبھی چلنا
محتاج جو اتنا ہو
اس شخص پہ تکیہ کیا
اس خاک کے پتلے پر
کرتے ہو بھروسہ کیا
اس وقت نظرآتے
دو چار جو ساتھی ہیں
حاجات کے مارے ہیں
موسم کے پرندے ہیں

اڑجائیں گے سب اک دن
دنیا کی حقیقت کیا
سب غرض کے بندے ہیں

اس کی چاہت مجھے شہزاد بنانے پہ مصر ہے

دل جنوں خیزترے خواب سجانے پہ مصر ہے
اور تقدیر اسے نیچا دکھانے پہ مصر ہے
ایک بے کار سا انسان ہوں گلیوں میں پھروں
اس کی چاہت مجھے شہزادہ بنانے پہ مصر ہے
شاعری پیار کی بھیجے وہ مجھے رات گئے
درحقیقت وہ مرے خواب میں آنے پہ مصر ہے
میں فقط چاند ہوں ندیا کا مجھے چھو کے نہ دیکھ
کیوں مرے عکس کو پانی میں نچانے پہ مصر ہے
اب محبت نہیں ہوتی، میں نے کوشش تو بڑی کی
دل پرانے کسی رشتے کو نبھانے پہ مصر ہے
ہر کوئی پیاز کی صورت ہے کئی پرتوں میں
ہر کوئی اپنی حقیقت کو چھپانے پہ مصر ہے

جنم کا دن مبارک ہو

سبھی جب بھول جاتے ہیں

تو اس کو یاد رہتا ہے

وہ اک موہوم سا رشتہ بہت پرواہ کرتا ہے

برس کے تین سو پینسٹھ دنوں کے بعد بھی دیکھو

گھڑی بارہ بجاتی ہے

تواک سیکنڈ سے پہلے ہی

اسی کی کال آتی ہے

جنم کا دن مبارک ہو""

اسےمجھ سے محبت ہے

مگر شاید!؟

جسے تم پیار کہتے ہو

جسے تم پیار کہتے ہو وہ افسانہ ہے منٹو کا
کہاں پر ختم ہو جائے کوئی بتلا نہیں سکتا

سانس چلتی ہے چلتے جاتے ہیں

سانس چلتی ہے چلتے جاتے ہیں
وقت کے ساتھ بہتے جاتے ہیں
کوئی سمجھا کبھی نہ سمجھے گا
دل سے مجبور کہتے جاتے ہیں
جھوٹ بولا دغا دیا اس نے
بس یہی بات لکھتے کاتے ہیں
وقت مرہم سہی مگر دیکھو
زخم ہر روز بڑھتے جاتے ہیں
دل دکھا اس قدر محبت میں
اشک بہتے ہیں بہتے جاتے ہیں
نبض چلتی ہے دل دھڑکتا ہے
شور ہوتا ہے سنتے جاتے ہیں
وہ جو بت کو خدا سمجھتے تھے
سر زمیں پر پٹختے جاتے ہیں
ہے ڈراتا ہمیں اکیلا پن
اپنے اندر ہی گھٹتے جاتے ہیں
زندگی سلطنت مقدر کی
ہم مقدر سے لڑتے جاتے ہیں
عشق مرتا نہیں مگر ریحان
عشق میں لوگ مرتے جاتے ہیں

جب تلک یہ سانسیں تھیں

جب تلک یہ سانسیں تھیں
چیختے رہے ہم تم
کیا ہوا مقدر کا
کیا ملا شکایت سے
قسمتوں کی تختی کو
زندگی کی سختی کو
جھیلنا ہی پڑنا تھا
جھیلتے رہے ہم تم
وقت کے سمندر میں
عمر کی حقیقت کیا
اس جہانِ بے حد میں
آدمی کی وقعت کیا
آسماں کی رفعت تک
ہم سے ناتوانوں کا
شور کب پہنچنا تھآ
لیکن اس حقیقت کا
کیا کریں کہ خاکی ہیں
دل میں درد رہتا ہے
درد کی روایت کو
پیٹتے رہے ہم تم

جب تلک یہ سانسیں تھیں
چیختے رہے ہم تم

غمزدہ اور اجنبی آنکھیں

غمزدہ اور اجنبی آنکھیں
مجھ کو لگتی نہیں تری آنکھیں
پہروں باتیں کریں خیالوں میں
سامنے کچھ نہ بولتی آنکھیں

یہ زندگی

یہ زندگی
جس کے بھی حوالے کی
وہی کھیلنے لگا اس کے ساتھ
سو آخر مایوس ہو کر
بہت مجبور ہو کر
محدود کر لیا خود کو
بس اپنے آپ تک!

کس قدر اجنبی لگتی ہیں وہ آنکھیں اب ریحاں

وہ جو اپنا تھا وہی غیر سا لگتا کیوں ہے
اس کی آنکھوں میں کسی اور کا چہرہ کیوں ہے
مجھ سے دیکھی نہیں جاتی تری انجان نظر
بخدا جان کے انجان سا بنتا کیوں ہے
دوغلے نینوں میں کچھ خواب ہمارے بھی تو تھے
غیر کا ہو کے تو ماضی سے مکرتا کیوں ہے
اس محبت نے کسی در کا نہ چھوڑا ہم کو
ریگِ تنہائی ہی مجنوں کا نصیبہ کیوں ہے
کس قدر اجنبی لگتی ہیں وہ آنکھیں اب ریحاں
پیار گر روح ہے تو پھر ایسے بدلتا کیوں ہے

ایک مدت سے میں نے سانسوں کو روکا ہوا ہے

تری امّید مجھے بوڑھا نہ ہونے دے گی

ایک مدت سے میں نے سانسوں کو روکا ہوا ہے

وہ مرا ہے کہ جیسے چاند مرا

وہ مرا ہے کہ جیسے چاند مرا

دیکھنے کو نظر کے پاس رہے

رات بھر چھت پہ میرے ساتھ رہے

لیکن اس کو پکڑتا نا ممکن

---------------------

پہروں باتیں کرے خیالوں میں

آتا جاتا رہے وہ خوابوں میں

وہ مرا ہے کہ جیسے خواب مرا

----------------------

بند مٹھی میں بند کچھ بھی نہیں

گال پھولے ہوا بھری ان میں

ہر شرارت میں اک خیانت ہے

زندہ رہنا کوئی سہل تو نہیں

اس کی یادوں میں کچھ سکون سا ہے

ورنہ جینے میں جی لگے نہ مرا

وہ مرا ہے کہ جیسے چاند مرا

وہ سب کچھ ہے مگر میرا نہیں ہے

جہاں کی ساری اچھی باتیں اس میں

وہ سب کچھ ہے بس اک میرا نہیں ہے

کیسے ہوتے ہیں وہ محبوب جو مل جاتے ہیں

تو نظرآئے تو اکثر یہ خیال آتا ہے

کیسے ہوتے ہیں وہ محبوب جو مل جاتے ہیں

بھیک سانسوں کی طلب کرتے گداگر ہم ہیں

ایک انجان مسافت کے مسافر ہم ہیں
بھیک سانسوں کی طلب کرتے گداگر ہم ہیں

اب زمانے کے حوالے ہیں توغم ہیں ہم ہیں

شوقِ تحریر مگر ہاتھ قلم ہیں ہم ہیں
راستہ گم ہے مگر تیز قدم ہیں ہم ہیں
عقل کے دیس میں دیوانے کدھر جائیں بھللا
دل جنوں خیز پہ تعزیروستم ہیں ہم ہیں
ہاتھ میں تلخیِ دنیا کا ہے زہرِ قاتل
آنکھ میں خواب کے مضمون رقم ہیں ہم ہیں
انتہا یہ کہ مچل لیتے ہیں دل ہی دل میں
ورنہ دن رات جدائی کے الم ہیں ہم ہیں
تیرے نینوں میں بسا کرتے تھے اچھے دن تھے
اب زمانے کے حوالے ہیں توغم ہیں ہم ہیں