رہینِ خوئے قناعت تھا وہ گدائی میں بھی

۲۴ جنوری ۲۰۱۲- جدید ادبی فورم میں کہیں گئی فی لبدیہ غذل- طرح مصرع : "رہینِ خوئے قناعت تھا وہ گدائی میں بھی"

ہم التزام کے عادی تھے آشنائی میں بھی
سو لطف آیا نہ دل کو تری رسائی میں بھی

وفا کے نام پہ ہم نے تو قید ہی کاٹی
کہ ایک ضبطِ مسلسل رہا جدائی میں بھی

میں دل کی انگلی کو تھامے خموش چلتا رہا
وہ لین دین کا قائل تھا آشنائی میں بھی

میں اپنے درد کی تشہیر کرتا رہتا ہوں
کہ ایک طرزفغاں ہے یہ بے نوائی میں بھی

بس ایک بار اسے پیار سے کوئی دیکھے
رہینِ خوئے قناعت تھا وہ گدائی میں بھی

ندامتوں میں گرا ہوں جھکا سا رہتا ہوں
کبھی تھا مجھ کو بہت زعم پارسائی میں بھی

وہ چھوڑ جائے مگر اس کو کوئی سمجھائے
کوئی سلیقہ تو ہوتا ہے بے وفائی میں بھی

متفرق خیلات - دیکھنے کو تو مرے ہاتھ میں ہے جام مگر

دیکھنے کو تو مرے ہاتھ میں ہے جام مگر
کون جانے کہ فقط پیاس بھری ہے اس میں

بانٹنے والے تجھے لوٹ کے آنا ہوگا
پہلی باری میں ملا مجھ کو لفافہ خالی

اس قدر دھوکے ملے چہرہِ انسانی سے

اب توجی کرتا ہے جنگل میں بسیرا کر لیں

زخم اوروں کو دکھا نا تو ہے ذلت اس کی
 دل اگر چوٹ بھی کھائے تو چھپا جاتا ہے

درد کتنا ہی بڑھے آہ نہ منہ سے نکلے
مجھ کو ہمدردیِ احباب سے خوف آتا ہے

الائو سانس کا جلتا

الائو سانس کا جلتا ہے سخت محنت سے
میں اپنے ذات سے نمٹوں تو آپ کو دیکھوں

مفردات

غمِ معاش میں الجھے ہیں روزوشب ایسے
نہ زندگی سے تعارف نہ موت کی ہی خبر

یہ دل تو لے کے چلا تھا تمہاری سمت مگر
ضرورتوں نے مرے راستے بدل ڈالے

بہت سے لوگ ہیں جن سے ملن ضروری ہے
مگر یہ سانس کی ڈوری کہ باندھ رکھتی ہے

گرآپ کہتے ہیں اچھا تو دوست یوں ہی سہی
یہ آئینہ تو مجھے سوگوار رکھتا ہے

راکھ کو آگ لگائے

اپنی محرومی کا بدلہ تو غریبوں سے نہ لے
راکھ کو آگ لگائے گا تو کیا پائے گا

تجھ کو ادراک نہیں

آزمائش ہے ترے ظرف کی یہ ظلم نہیں

تجھ کو ادراک نہیں خاص نظر میں ہے تو

میں خواہشوں کا پجاری بڑے عذاب میں ہوں

گناہ کر نہیں سکتا، ثواب کرتا نہیں
میں خواہشوں کا پجاری بڑے عذاب میں ہوں

علی بھائی کی اصلاح

گنہ کے باب میں نہ ہی درِ ثواب میں ہوں
میں خواہشوں کا پجاری بڑے عذاب میں ہوں

مرے ارادے بھی کمزور میرا دل بھی غضب

مرے ارادے بھی کمزور میرا دل بھی غضب
میں ہار جائوں گا اے حسن امتحان نہ لے

ہم ضمیر اپنے کو سولی پہ چڑھانے والے

بے خودی کا ہی سہاراہے  کہ جی پاتے ہیں
ہوش آتا ہے تو پتھر کے سے ہو جاتے ہیں

ہم ضمیر اپنے کو سولی پہ چڑھانے والے
خلوت ذات کے اوقات سے گھبراتے ہیں

آئینہ توڑدیا پھوڑ لیں آنکھیں اپنی
داغ چہرے کے مگر پھر بھی نظر آتے ہیں

دل یہ کالا ہوا اتنا کہ گنہ کر کے بھی
مطمئن رہتے ہیں آرام سے سو جاتے ہیں

ہم پہ تکیہ نہ کرو صدق و امانت کا کھی
ہم وہ بدذات جو خود آپ کو ٹھگ جاتے ہیں
یا
ہم وہ بدذات ہیں جو خود  کو بھی ٹھگ جاتے ہیں

میں آسماں جسے کہتا رہا

میں آسماں جسے کہتا رہا وہ نیل گگن
میری طرح کا خلا تھا نظر کا دھوکا تھا

متفرق خیالات

تیری چاہت پہ بضد ہوں مگر اس ضد کا کیا
میں بھی انسان ہوں تھک جائوں گا آخر اک دن

کتنے سالوں سے ترا نام بھی آیا نہ کہیں
یاد بھولے سے چلی آتی ہے مرضی اس کی

شمع کتنی بھی جلے راکھ مقدر اس کا
شعلہ کتنا بھی چڑھے انت دھواں ہی ہو گا

تیرے آنے پہ بہت خوش ہوئے زندہ ہی رہے!
ماتمِ ہجر بھی ہوگا تو کہاں تک ہو گا

اس قدر خوف محبت سے ہے دل میں کہ اب
چاہ کر بھی یہ محبت نہیں ہو گی تجھ سے

پھول جنت سے گرے ہیں کہ حسیں چہرے ہیں
حسنِ انسان سے بڑھ نہیں جلوہ کوئی

بکھرے خیالات

بساط کیا ہے بشر کی ؟ بشر سے آس نہ رکھ

برسنا چاہے اگر تو تو بارشوں سا برس

حیات مہنگی ہے کتنی، معالجوں کو پتہ
جو سانس سانس پہ قیمت وصول کرتے ہیں

دوائیاں تو میں برسوں سے کھا رہا تھا مگر
شفا ملی ہے مجھے صرف تیرے لہجے سے

گناہ کرتا رہوں اور ساتھ توبہ بھی
خدا رحیم بہت ہے پر اتنا بھولا نہیں

تھا زعم ہم کو بہت اپنی پارسائی پر
بس ایک لمحے کی سازش نے بے زبان کیا

میں کانپ جاتا ہوں دیکھوں جو بے بسی اپنی
غرور پھر بھی ہے اتنا خدا کہوں خود کو

بہت سا پیارجو اب تک تہہِ زبان رہا
نکلتا رہتا ہے دل سے دعائوں کی صورت

آج کچھ درد مرے دل میں سوا ہوتا ہے

اردو انجمن کا فی البدیہ طرحی مشاعرہ

درد رہتا ہے نہ سکھ چین سدا ہوتا ہے
سب چلے جاتے ہیں بس نامِ خدا ہوتا ہے

وقت دریا خس و خاشاک ہیں ہم تم
دیکھتے دیکھتے ہر نقش ہوا ہوتا ہے

موت نے دانت نکالے ہیں میں سہما سا پھروں
زندگی جب بھی تجھے چاہوں دغا ہوتا ہے

یہ محبت جو زمانے میں بہت عام سی ہے
اس محبت میں بشر اپنا خدا ہوتا ہے

جسم کو جسم سے مطلب ہے خلاصہ یہ ہے
باقی تمہید ہے تمہید سے کیا ہوتا ہے

عشق بھی حسن سے وابستہ ہے سائے کی طرح
حسن ڈھلتا ہے تو سایہ بھی جدا ہوتا ہے

شعر لکھتا ہوں تو خامے سے اٹھیں ٹیسیں سی
آج کچھ درد مرے دل میں سوا ہوتا ہے

جان دے کر بھی بچانا یہ ثقافت لوگو

چہرہ پردے سے ڈھکا نظریں ہیں نیچی نیچی
یہ مری قوم کی بیٹی کی ہے صورت لوگو

غیر نے نقب زنی کی ہے مری رسموں ہر
جان دے کر بھی بچانا یہ ثقافت لوگو

تکلیف

تجھ کو اپنانے میں مجھ کو تو کوئی عذر نہیں
لیکن اس دنیا کو ہو جائے گی تلکیف بہت

کوئی آئے گا

کوئی آئے گا مرے پاس تو کیوں آئے گا
ایک ہی دل تھا جو اب ٹوٹ چکا مر بھی چکا

جگجیت سنگھ کی یاد میں---

 جگجیت سنگھ کی یاد میں---

عمر بھر جاگتے رہنا تھا مقدر جس کا
سوگئی آج وہ آواز ہمیشہ کے لیے

وہ کوئی فرد نہیں شہر تھا دل والوں کا
اس کے مر جانے سے ویران ہوئے لاکھوں دل

وقت کی کشتی

ہجر بھی وصل بھی چاہت بھی وفا بھی دل بھی
آنکھ بھہ پونٹ بھی ہونٹوں سے لٹکتا تل بھی
وقت کی کشتی میں بیٹھے ہیں چلے جائیں گے سب!

کوزہ گر تو نے اگر پیار سے جوڑا ہوتا

چاہنے سے ہی کوئی شخص جو اپنا ہوتا
کیسے ممکن تھا مرا خواب پرایا ہوتا

لوگ اپنے ہی مسائل میں مگن بھی گم بھی
تو بھی اس بھیڑ میں ہوتا تو اکیلا ہوتا

مسئلہ جینے کا درپیش کبھی خوفِ اجل
مل بھی جاتا وہ اگر کرب نہ تھوڑا ہوتا

آدمی جذبہِ بےتاب کی مٹی سے بنا
رزقِ ممنوع نہ کھاتا تو بھی ایسا ہوتا

کارواں ساتھ سہی درد ہیں اپنے اپنے
تو زمانے سے نبھاتا بھی تو تنہا ہوتا

میں بگولے کی طرح پھرتا نہ گلیوں گلیوں
کوزہ گر تو نے اگر پیار سے جوڑا ہوتا

خواب بوڑھے بھی تو ہو جاتے ہیں مرتے بھی ہیں
انتظار آپ کا ہوتا بھی تو کتنا ہوتا
http://www.facebook.com/photo.php?fbid=175743885868384&set=oa.361520293865926&type=1&theater