سنتالی دی ونڈ نے سانوں
ونڈیا کد سی؟
!!!وڈھیا سی
سجے کن توں
کھبے کن نوں
سجی اکھ توں
کھبی اکھ نوں
سجی بانہہ توں
کھبی بانہہ نوں
سجّی لت توں
کھبی لت نوں
وکھرا وکھرا کیتا سی
آزادی نوں لبھن والے
اج وی لبھدے پھردے نیں
میں پنجابی ماں دا جایا
دیس پنجاب دے دل وچ یعنی
شہر لہور چ بیٹھا واں
تے دلّی تخت دا قیدی آں
میرے بچے جد اسکولوں آوندے نیں
رو رو ایہو دسدے نیں
آج وے میڈم ماریا سانوں"
نالدے بچے ہسدے سی تے
پینڈو پینڈو کہندے
باپو ایہہ پنجابی بولی
"ساتھوں ہور نئیں بولی جاندی"
میں پنجابی ماں دا جایا
دیس پنجاب دے دل وچ یعنی
شہر لہور چ بیٹھا واں
تے دلّی تخت دا قیدی آں
میرے بچے جد اسکولوں آوندے نیں
میرے گھر دی کیبل اتے جنے ٹی وی چینل نیں
دلی دی بولی بولدے نیں
میرے دیس دے اندر جنے
مکتب مدرسے نیں
دلی دی بولی بولدے نیں
میرے دیس دے اندر جنے
دفتر تھانے نیں
دلی دی بولی بولدے نیں
دلّیے بھاگاں ولیے
اس دھرتی تے
صدیاں صدیاں راج سی تیرا
اج وی راج ای تیرا
ونڈاں کر کے کجھ نئیں لبھیا
کندھاں کر کے کجھ نئیں کھٹیا
سنتالی دی ونڈ نے سانوں
ونڈیا کد سی؟
!!!وڈھیا سی
آزادی نوں لبھن والے
اج وی لبھدے پھردے نیں
No comments:
Post a Comment