سنتالی دی ونڈ نے سانوں
ونڈیا کد سی
وڈھیا سی
سجّے کن توں کھبے کن نوں
سجّی اکھ توں کھبی اکھ نوں
سجی بانہہ توں کھبی بانہہ نوں
سجی لت توں کھبی لت نوں
وکھرا وکھرا کیتا سی
آزادی نوں لبھن والے
اج وی لبھدے پھردے نیں
میں پنجابی ماں دا جایا
دیس پنجاب دے دِل وِچ یعنی
شہر لہور چ بیٹھا واں
تے دلّی تخت دا قیدی آں
میرے بچے جد اسکولوں آوندے نیں
رو رو ایہو دسدے نیں
اج وی میڈم ماریا سانوں
اج وی بچّے ہسدے سی تے
پینڈو پینڈو کہندے سی
بابا ایہہ پنجابی بولی
ساتھوں ہور نئیں بولی جاندی
میں پنجابی ماں دا جایا
دیس پنجاب دے دِل وِچ یعنی
شہر لہور چ بیٹھا واں
تے دلّی تخت دا قیدی آں
میرے گھر دی کیبل اُتّے
جِنّے ٹی طی چینل نیں
دلّی دی بولی بولدے نیں
میرے شہر لہور دے اندر
جنّے مکتب کالج نیں
دلّی دی بولی بولدے نیں
جنے دفتر تھانے نیں
دلّی دی بولی بولدے نیں
دلّیے بھاگاں والیے
اس دھرتی تے
صدیاں صدیاں راج سی تیرا
اج وی راج ای تیرا
کندھاں کر کے
کجھ نئیں کھٹیا
ونڈاں کر کے کجھ نئیں کھٹیا
سنتالی دی ونڈ نے سانوں
ونڈیا کد سی
وڈھیا سی
ونڈیا کد سی
وڈھیا سی
آزادی نوں لبھن والے
اج وی لبھدے پھردے نیں
No comments:
Post a Comment