پت دا بستہ

پت دا بستہ اینا بھارا چکّے لک مڑجائے
کھول کے دیکھیا اندر کیہڑے روڑے پتھر پائے

بے مطلب جئے سبق بے گانے پردیسوں منگوائے
ست سمند پار دے قصّے وچ کتاباں پائے

روندے جاندے رٹدے جاندے  لفظ انجان زباں دے
علم دے ناں تے ظلم ای سہندے بچے پاکستاں دے

چھے گھنٹے دی قید مشقت، مجرماں وانگوں کٹدے
اج اسکول نہ گھلو سانوں، روز ای منتاں کردے

جا اسکولے ساڈے بچے کیہی سکھیا سکھدے
اپنی قوم توں نفرت کردے آپنے آپ توں کِھجدے