جیتے ہیں کہ جینے کی یہ عادت ہے پرانی

 

دل کا کبھی جھگڑا ہے کبھی فکر ہے جاں کی
یہ عالمِ امکان یہ دنیا ہے گماں کی

بیٹھے ہیں بڑی دیر سے چپ چاپ سرِرہ
وہ پوچھنے آیا ہے نہ ہم نے ہی بیاں کی

پہلے سے مراسم ہیں نہ پہلی سی محبت
بے خوف وہ جذبے نہ وہ شوخی ہے بتاں کی

جیتے ہیں کہ جینے کی یہ عادت ہے پرانی
سانسوں کا تسلسل ہے کہ گردش ہے زماں کی

خواہش پہ محبت کا کفن باندھ رہے ہو
یہ نفس کا دھوکا یہ کثافت ہے زباں کی

ہر چیز کی ہوتی ہے کوئی عمر مری جاں
اب اپنی محبت بھی ہوئی فصل خزاں کی

خاموش و حسیں صورتِ تصویر ہو بیٹھی
کچھ بات سمجھتی ہو محبت زدگاں کی؟